Исроилда йирик ўрмон ёнғинлари: Мамлакат халқаро ёрдам сўрамоқда

Исроилда мамлакат тарихидаги энг муҳим сана — Мустақиллик кунига бағишланган барча оммавий тадбирлар кенг кўламли ўрмон ёнғинлари сабаб бекор қилинди. Бу ҳақда 30 апрель, чоршанба куни мамлакатнинг Ёнғин ва қутқарув хизмати расмий тарзда маълум қилди. Қайд этилишича, тадбирларни ўтказиш учун хавфсизлик талаблари таъминланиши имкониятдан ташқари вазиятга айланган.

Ҳозирда Исроил халқаро ҳамжамиятдан фавқулодда ёрдам сўраб мурожаат қилди. Мамлакатга Греция, Италия ҳамда Хорватиядан ўт ўчирувчи самолётлар ва қутқарувчилар гуруҳлари аллақачон жўнаб кетган. Шунингдек, Фаластин миллий маъмурияти ҳам Исроилга ўзи томонидан кўрсатилиши мумкин бўлган ҳар қандай ёрдамни таклиф қилган.

The Times of Israel нашрининг ёзишича, мамлакат бўйлаб ёйилган кучли ёнғинни бартараф қилиш ишларига 12 та ўт ўчирувчи самолёт, 100 дан ортиқ ўт ўчирувчи бригада ва ҳарбий хизматчилар сафарбар этилган. Айни пайтда бир нечта аҳоли пунктларидан аҳолини хавфсиз ҳудудларга эвакуация қилиш жараёни бошланган, шунингдек, яна қатор шаҳарлар ва қишлоқлар эҳтимолий эвакуацияга тайёр турибди. Мамлакатнинг йирик магистраль йўли вақтинчалик тўлиқ ёпиб қўйилган.

Кенг кўламли ёнғин 30 апрель куни тонгда Қуддус яқинидаги Месилат Цион аҳоли пунктига яқин жойлашган Эштаол ўрмонидан бошланган. Унинг тез тарқалиши ва кучайиши оқибатида мамлакатнинг Ёнғин ва қутқарув хизмати «Ёнғин зарбаси» фавқулодда ҳолат режимини жорий қилган. Бу режим, одатда, вазиятни назоратдан чиқиб кетиш хавфи юзага келганда амалга оширилади.

Полиция ва тегишли хизматлар ёнғин махсус равишда қўйилган бўлиши мумкинлигини ҳам эҳтимолдан холи қилгани йўқ. Айни пайтда, ёнғин қўйганликда гумон қилинаётган бир шахс аллақачон ҳибсга олинган.

Ўт ўчирувчи ва қутқарувчилар аҳолига мурожаат қилиб, Байт Шемеш ва Қуддус шаҳарлари атрофидаги ўрмон ёнғинлари содир бўлаётган ҳудудлардан узоқроқда бўлишни ҳамда фавқулодда хизматлар томонидан бериладиган тавсияларга қатъий амал қилишни сўрамоқда. «Замин»ни Telegram’да ўқинг!