Украина доллардан воз кечиб, еврога ўтишни режалаштирмоқда

Украина Миллий банки раҳбари Андрей Пишнийнинг Reuters агентлигига маълум қилишича, мамлакат АҚШ долларидан воз кечиб, еврога ўтиш имкониятини кўриб чиқмоқда. Бу қарор Евроиттифоққа аъзо бўлиш истиқболи, Европа билан мудофаа соҳасидаги ҳамкорликнинг кучайиши, глобал бозорлардаги беқарорлик ва халқаро савдонинг бўлиниб кетиши эҳтимоли билан боғлиқ.

Пишнийнинг таъкидлашича, бу жараён мураккаб бўлиб, юқори сифатли ва ҳар томонлама тайёргарликни талаб этади. Ҳозирда АҚШ доллари Украина валюта бозорининг барча сегментларида устунлик қилмоқда, аммо евро билан амалга оширилаётган операциялар улуши кўплаб йўналишларда ўсиб бораётганини қўшимча қилди.

Украина 1996 йилда гривнани жорий этган ва ўшандан бери долларни асосий валюта сифатида қабул қилган. 2022 йилдаги Россия ҳужумидан сўнг, Миллий банк долларга нисбатан курсни белгилаган, кейинчалик 2023 йил октябрида бошқарилувчи курсга ўтилган.

Евроиттифоқ билан яқинлашув ва иқтисодий тикланиш Украина иқтисодиётининг ўсишини 2025–2026 йилларда 3.7–3.9% гача таъминлаши кутилмоқда. Бироқ, бу жараён урушнинг якунланиши ва хавфсизлик кафолатларига боғлиқ бўлади.

Молдова 2025 йил 2 январда еврони асосий валюта сифатида қабул қилгани Украина учун илҳом манбаи бўлди. Украина ҳам шундай йўлни танлаши мумкин. «Замин»ни Telegram’да ўқинг!