Зеленский Туркиядаги музокараларга тайёр: Россиянинг жавоби қандай бўлади?

Украина президенти Володимир Зеленский 15 май куни Туркиянинг Истанбул шаҳрида ўтказилиши режалаштирилган музокараларга тайёр эканлигини яна бир бор таъкидлади. Аммо Россия томонидан аниқ ким иштирок этиши масаласи ҳанузгача ноаниқ бўлиб қолмоқда.

Зеленский ўзининг сўнгги чиқишида Россия томонининг музокараларга нисбатан муносабатини танқид қилиб, уларнинг аниқ ва қатъий жавоб бермаслигидан шикоят қилди.

«Ҳозир бутун дунё Россия президенти Владимир Путиндан фақатгина тўғридан-тўғри музокараларга розилик билдирувчи оддий "ҳа" жавобини кутаяпти. Аммо ўша пайтда ҳам Россия Украинага қарши зарбаларни давом эттирмоқда. Бундай ҳаракатларнинг ҳеч қандай ҳарбий мантиғи йўқ, бу фақат урушни чўзишга қаратилган ҳаракатдир», – деди Зеленский ўз баёнотида.

Украина президенти Туркиядаги учрашувда ким иштирок этишини Россия ҳали ҳам аниқ тасдиқламаганидан хавотир билдирди. Унинг таъкидлашича, Кремлга яқин бўлган оммавий ахборот воситалари орқали тарқатилаётган маълумотлар ҳозирча ишончсиз ва турли хил талқин қилинаётган сигналлардан иборатдир.

«Ҳозир мен Россия томонидан ким қатнашишини аниқлаштиришини кутаяпман. Бу жуда муҳим. Фақат шундан кейин биз кейинги ҳаракатларимизни белгилай оламиз. Россия томонидан етарлича ишончли ва расмий тасдиқланган маълумотга эга бўлмагунча, ҳар қандай хулоса чиқаришдан тийиламиз», – деди Зеленский.

Шунингдек, Зеленский Туркияда бўлиб ўтадиган музокараларда АҚШ президенти Доналд Трампнинг ҳам қатнашиши эҳтимолини эслатиб ўтди. Аввалроқ АҚШнинг юқори даражали вакиллари, шу жумладан махсус вакил Кит Келлог ҳамда президент Трампнинг ўзи ҳам ушбу музокараларда иштирок этиши мумкинлигини билдирганди.

«Биз музокаралар учун ҳар қандай форматга очиқмиз ва ундан қўрқмаймиз. Эртага Туркияда бошланадиган учрашувларда ўзимизнинг позициямиз ва фикримизни аниқ ҳамда қатъий баён қиламиз», – дея таъкидлади Зеленский.

Туркия ташқи ишлар вазири Ҳоқон Фидан эса музокараларнинг формати ҳали-ҳануз аниқланмаганини маълум қилди. Бу учрашув Москва ва Киев ўртасидаги 2022 йил баҳоридаги ўқ узишни тўхтатиш бўйича музокаралардан кейинги илк тўғридан-тўғри мулоқот бўлади.

Халқаро жамоатчиликнинг диққати эртанги учрашувга қаратилган бир вақтда, Россия томони қандай жавоб қайтариши ҳали номаълум бўлиб турибди. Украина эса тинчлик йўлида ҳар қандай имкониятдан фойдаланишга тайёрлигини қатъий равишда билдирди. «Замин»ни Telegram’да ўқинг!