date

Истанбулда Украина–Россия музокаралари: Янги раунддан нималар кутиляпти?

Истанбулда Украина–Россия музокаралари: Янги раунддан нималар кутиляпти?
Россия ва Украина ўртасидаги урушда навбатдаги ҳал қилувчи даврга етилиб, тарафлар яна музокаралар столига қайтиш арафасида. Украина Миллий хавфсизлик ва мудофаа кенгаши котиби, собиқ мудофаа вазири Рустем Умеровнинг ташаббуси билан, келаси ҳафта — 21-27 июль кунлари, музокараларнинг учинчи раунди Истанбулда ўтказилиши таклиф қилинди. Бу ҳақда мамлакат президенти Володимир Зеленский 19 июль якунлари бўйича қилган мурожаатида алоҳида таъкидлади.

Зеленскийнинг сўзларига кўра, музокаралар жараёнига тезлик ва динамика киритилиши зарур: “Ўт очишни тўхтатишга эришиш учун ҳамма имкониятдан фойдаланиш керак. Россия ечимдан қочишни бас қилиши лозим”. Унинг фикрича, янги раунддаги асосий масалалар — ҳарбий асирларни алмашиш, болаларни қайтариш ва фаол қотилликлардан воз кечиш бўлади. Зеленский бу музокараларни етакчилар даражасида ўтказиш тарафдори эканини, “чиндан ҳам узоқ муддатли тинчлик” учун бу зарурлигини таъкидлади.

У, шунингдек, Владимир Путин билан икки томонлама ва, керак бўлса, Доналд Трамп иштирокида уч томонлама учрашувга ҳам тайёр эканини билдирди. Бу эса Киевнинг халқаро даражадаги музокаралар учун очиқ эканини кўрсатади.

ТАСС агентлиги маълумотига кўра, Россия музокарачилари ҳам Украина томонидан янги раундни таклиф этилганини тасдиқлаган. Бироқ, санаси ҳали келишилмаган ва Кремл ҳамда Россия Ташқи ишлар вазирлиги ҳозирча Зеленский ташаббусига расмий муносабат билдирмаган. Фақатгина Россия президенти матбуот котиби Дмитрий Песков 18 июль куни Россия “музокаралар жараёнига динамика қўшиш” тарафдори эканини айтган.

Истанбул аввалги раундларда ҳам музокаралар учун асосий майдон бўлган. 16 май ва 2 июнь кунлари ўтказилган икки музокарада тарафлар тўлиқ ўт очишни тўхтатиш масаласида келишувга етиша олмаган, лекин ҳарбий асирлар ва жасадлар алмашинуви юзасидан келишиб олишган.

Германиянинг Der Spiegel нашрига кўра, Украина бу галги ташаббуси ортида АҚШ билан узоқ муҳокамалар турибди, деган тахминлар ҳам мавжуд. Яқинда АҚШ президентининг Украина бўйича махсус элчиси Кит Келлогнинг Киевга ташрифи ва Доналд Трамп томонидан Россияга қўйилган янги таҳдидлар ушбу жараёнга қўшимча фон яратди.

Кўриниб турибдики, Истанбулда ўтадиган учинчи раунд нафақат тарафлар ўртасидаги зиддиятни юмшатиш, балки глобал сиёсий муҳитда ҳам янги саҳифа очиш имкониятини беради. Жаҳон жамоатчилиги эса бу учрашувдан анча муҳим натижалар кутаяпти — бу сафар музокаралар ҳақиқий тинчлик сари қадам бўла оладими ёки яна орзуда қоладими? Саволлар кўп, аммо интизорлик ҳам шунчалик юқори.
Ctrl
Enter
Хато топдИнгизми
Иборани ажратиб Ctrl+Enter тугмасини босинг
Янгиликлар » Дунё » Истанбулда Украина–Россия музокаралари: Янги раунддан нималар кутиляпти?