Ямандаги ҳусийлар ҳаракати — “Ансор Аллоҳ” Олий сиёсий кенгаши раиси Маҳди ал-Машат Исроилга жиддий огоҳлантириш йўллади. Унинг сўзларига кўра, энди исроилликлар ўзларини ҳеч қачон хавфсиз ҳис этолмайди ва олдинда улар учун “қоронғу кунлар” кутмоқда.
Ал-Машатнинг таъкидлашича, ҳозирги шароитда барча компаниялар ҳеч кечикмасдан яҳудий давлати ҳудудини тарк этиши лозим.
“Биз курашни узлуксиз давом эттирамиз ва ҳар қандай чақириққа амалдаги ҳаракат билан жавоб қайтарамиз. Озодлик ва мустақилликнинг нархи қон билан тўланади. Биз фидойи, саботли ва итоаткор халқмиз”, – деди ал-Машат. Унинг нутқи “Ал-Масираҳ” телеканали орқали эфирга узатилди.
Телеканал маълумотига кўра, ал-Машат амалда ҳусийлар қўлидаги ҳудудларда Яман президенти ҳисобланади.
Бу чиқиш Исроилнинг ҳаводан берган кучли зарбалари оқибатида ҳусийлар ҳукумати бош вазири Аҳмад Ғалеб ар-Раҳавий ҳалок бўлганидан сўнг янгради. “Yamen Monitor” нашри унинг ўлими исёнчилар учун “салмоқли йўқотиш” ва “катта зарба” сифатида баҳоланганини ёзди.
«Замин»ни Telegram’да ўқинг!
