Тянцзин шаҳрида ўтказилган Шанҳай ҳамкорлик ташкилоти (ШҲТ) саммити доирасида Хитой ва Арманистон ўртасида муҳим келишув имзоланди. Қўшма баёнотда икки давлат стратегик ҳамкорликни йўлга қўйгани эълон қилинди ҳамда Тайван Хитойнинг ажралмас қисми экани алоҳида таъкидлаб ўтилди.
Арманистон ҳукумати матбуот хизмати хабарига кўра, саммит доирасида бўлиб ўтган учрашувда икки давлат ўртасида тарихий аҳамиятга эга янги босқич бошланди. Арманистон бош вазири Никол Пашинян ШҲТ+ форматидаги йиғилишларда қатнашиб, ХХР раиси Си Жинпинг билан учрашди. Музокараларда фан, таълим, маданият, туризм, ахборот ва метрология каби соҳаларда ҳамкорликни чуқурлаштириш зарурлиги қайд этилди.
Пашинян Арманистоннинг ШҲТ аъзолигига қизиқиши ва бу йўналишда ҳамкорликни янада кенгайтириш ниятини тасдиқлади. Томонлар ШҲТ майдонида биргаликдаги ҳаракатларни кучайтириш ва янги лойиҳаларни амалга ошириш бўйича келишиб олди.
Арманистон ҳукумати тарқатган маълумотда қайд этилишича, Си Жинпинг Хитойнинг Арманистон Республикасининг сиёсий мустақиллиги, суверенитети ва ҳудудий яхлитлигини қатъий қўллаб-қувватлашини билдирди. Шунингдек, Хитой Арманистон ҳукуматининг «Дунё чорраҳаси» ташаббусини ҳамда минтақавий коммуникация йўлларини очиш ва ривожлантиришга тўлиқ ҳимоя ва кўмак беришини маълум қилди.
Шу тариқа, Тянцзиндаги саммит Хитой ва Арманистон муносабатларида янги саҳифани очиб берди ва келгусида икки давлат алоқалари янада мустаҳкамланишига замин яратди.
«Замин»ни Telegram’да ўқинг!
