АҚШ президенти Доналд Трамп янги баёнотида ўз мамлакати глобал майдонда жиддий йўқотишларга дуч келганини айтиб ўтди. Оқ уй раҳбарининг таъкидлашича, Вашингтон Хитой таъсири ортидан Ҳиндистон ва Россияни «йўқотганга ўхшайди».
Трамп ижтимоий тармоқда ёзган постида:
— «Биз Ҳиндистон ва Россияни энг даҳшатли ва тубсиз Хитой туфайли қўлдан бой бердик. Уларнинг биргаликда узоқ ва фаровон келажакка эришишларини тилайман», — деб қайд этди.
У ўз баёнотига Россия президенти Владимир Путин, Хитой раиси Си Жинпинг ва Ҳиндистон бош вазири Нарендра Модининг қўшма суратларини ҳам илова қилди.
Маълумки, бу уч раҳбар бир неча кун олдин Хитойнинг Тянжин шаҳрида бўлиб ўтган Шанхай ҳамкорлик ташкилоти саммитида учрашган эди. Саммитда Путин ва Си Жинпинг АҚШ ҳамда Европанинг ҳукмронлигисиз янгича «кўп қутбли дунё тартиби» ғоясини яна бир бор илгари сурди. Уларнинг чақириқлари Вашингтоннинг глобал жараёнлардаги марказий ролини чеклашни назарда тутади.
Трамп эса бу жараёндан хавотирга тушмаётганини таъкидлаб, олдинроқ Хитой ва Россиянинг АҚШга қарши бирлашиши унга «умуман хавф туғдирмаслигини» айтганди. Унинг фикрича, бу давлатлар ҳеч қачон АҚШга қарши ҳарбий куч ишлатишга бормайди.
— «Агар улар шундай йўл тутса, бу ўзлари учун энг ёмон вариант бўлади», — деган эди Трамп 2 сентябр кунги чиқишида.
Шундай қилиб, АҚШ, Хитой, Россия ва Ҳиндистон ўртасидаги муносабатлар янада мураккаблашаётгани кўринаётир. Геосиёсий саҳнадаги бундай кескин ўзгаришлар келажакда жаҳон тартибининг янги йўналишини белгилаб бериши мумкин.
«Замин»ни Telegram’да ўқинг!
