Германиянинг Der Spiegel ҳафталик нашри ва AFP ахборот агентлиги тарқатган хабарларга кўра, Берлин ҳукумати Парижда ўтадиган «кўнгиллилар коалицияси» йиғилишида Украина хавфсизлигини таъминлаш борасидаги ўз таклифларини тақдим этиши керак эди. Маълумотларга қараганда, Германия канцлери Фридрих Мерц видеоконференция шаклида йиғилишда иштирок этиб, урушдан кейинги давр учун Украина хавфсизлиги бўйича режани муҳокамага қўйиши белгиланган.
AFP агентлиги ҳукуматдаги манбаларга таяниб ёзишича, асосий эътибор Украинанинг ҳаво мудофааси ва ҳужумкор ҳарбий имкониятларини кучайтиришга қаратилади. Шу билан бирга, Мерцнинг таклифлар пакетида бундесвер аскарларини Украина ҳудудига жойлаштириш режаси назарда тутилмагани алоҳида таъкидланган.
Берлиндаги суҳбатдошлар маълум қилишича, Германиянинг Украина хавфсизлигини таъминлашдаги иштироки учун бир қатор шартлар зарур. Жумладан, АҚШ ва Россиянинг музокараларга тайёрлиги, ҳукумат коалицияси доирасида консенсусга эришиш ҳамда Бундестагда қўллаб-қувватланиши муҳим ҳисобланади.
Der Spiegel нашри ёзганидек, Германия ҳукумати тинчлик келишуви имзолангандан кейин Украина хавфсизлигини таъминлашда бундесвер иштирокини чеклаш ниятида. Шу йўл билан Берлин ўз зиммасига ортиқча мажбуриятлар олишдан қочишга ҳаракат қилмоқда.
Шу тариқа, Париждаги «кўнгиллилар коалицияси» йиғилишида Берлиннинг таклифлари Киев хавфсизлиги борасидаги энг муҳим масалалардан бирига айланиши кутилмоқда.
«Замин»ни Telegram’да ўқинг!
