АҚШ президенти Доналд Трамп Россия ва Украина ўртасидаги можарога доир янги баёнот берди. Унга кўра, урушни тугатиш учун Донбасс минтақаси “бўлиниши” керак ва унинг катта қисми Россия назоратида қолиши мумкин, деб хабар берди Reuters.
19 октябрь куни Air Force One бортида журналистлар билан суҳбатда Трамп “Донбасснинг кўп қисми амалда Россия қўлида эканини” таъкидлаб, “мавжуд чегаралар шундайлигича қолиши лозим”, дея фикр билдирди.
«Ҳаммаси қандай бўлса, шундай қолсин. Бу ҳудуд аллақачон бўлинган. Менимча, минтақанинг 78 фоизи Россия томонидан эгалланган. Кейинчалик улар ўзаро келишувга етиши мумкин. Аммо ҳозирча ҳар икки тараф фронт чизиғида тўхташи, уйига қайтиши ва одамлар ўлдирилишини тўхтатиши керак», — деди Трамп.
Президентнинг таъкидлашича, урушни давом эттириш фақат янги қурбонлар ва вайронагарчиликка олиб келади. Шу сабабли, Трамп икки томонни тезроқ тўхташ ва тинч музокараларни бошлашга чақирди.
Шу билан бирга, у The Financial Times нашрида 19 октябрь куни чоп этилган хабарни рад этди. Ушбу мақолада Трамп Зеленский билан учрашувда “бутун Донбассни Россияга топширишни сўрагани” ҳақида ёзилган эди. Бу маълумотга кўра, у Украина раҳбарини “акс ҳолда Путин мамлакатни йўқ қилиши мумкинлиги” билан огоҳлантиргани айтилган.
Трамп бу хабарни “асоссиз ва бўрттирилган” деб баҳолади ҳамда “бундай гаплар айтилмаганини” таъкидлади.
Суҳбат давомида Америка раҳбари Ҳиндистон ҳақида ҳам фикр билдириб, бош вазир Нарендра Модининг Россия нефтини сотиб олишни қисқартириш ҳақида берган ваъдасини эсга олди. «Агар бу ваъда бажарилмаса, Ню-Деҳли катта божлар тўлашда давом этади», — деди Трамп.
Аналитиклар фикрича, Трампнинг баёноти Украина уруши бўйича янги сиёсий босқични бошлаши мумкин. Унинг Донбассни бўлиш таклифи Ғарбда кескин баҳс ва турли муносабатларга сабаб бўлиши кутилмоқда.
Шундай қилиб, Доналд Трампнинг бу сўзлари Украина–Россия можаросида янги дипломатик йўл излаш уриниши сифатида талқин қилинмоқда. Президентнинг асосий фикри — урушни тўхтатиш ва тинч музокаралар учун замин яратишдир.
“Zamin”ни Telegram'да ўқинг!
