Россия ва АҚШни боғлайдиган Беринг бўғози орқали туннель қурилиши ҳақида янги маълумотлар эълон қилинди, деб хабар берди Topnews.
Россия тўғридан-тўғри инвестициялар жамғармаси (РФПИ) раҳбари ва президентнинг халқаро иқтисодий ҳамкорлик бўйича махсус вакили Кирилл Дмитриевнинг сўзларига кўра, лойиҳа қиймати камида 8 миллиард долларни ташкил этади.
Дмитриев таъкидлашича, норасмий равишда “Путин–Трамп туннели” деб аталган бу лойиҳани саккиз йилдан камроқ вақтда амалга ошириш мумкин. Туннель темир йўл ва юк ташиш учун мўлжалланган бўлиб, “Россия ва АҚШнинг қўшма ресурсларини ривожлантириш имконини яратади”, – деди у.
Унинг таърифига кўра, Беринг бўғози остидаги туннелнинг узунлиги 98–113 километр бўлиб, бу Франция ва Буюк Британияни боғлайдиган машҳур Евротоннелдан (51 км) деярли икки баравар узунроқ бўлади.
Кирилл Дмитриев Илон Маскга мурожаат қилиб, The Boring Company технологиясидан фойдаланишни таклиф қилди. Бу усул қурилиш муддатини қисқартириб, харажатларни сезиларли даражада тежаши мумкинлиги айтилмоқда.
Дмитриевнинг сўзларига кўра, “Путин–Трамп туннели” ғояси жамоатчиликда катта қизиқиш уйғотган. “Бу ҳақдаги хабар икки миллион марта кўрилди. Трамп буни қизиқарли деб атади, Зеленский эса ёқтирмади. Бу мавзуда энг йирик ОАВлар ёзди”, — деди у.
Қизиқ томони шундаки, Чукотка ва Аляска ўртасидаги транспорт йўлагини яратиш ғояси илк бор 2007 йилда муҳокама қилинган. Ўшанда Иқтисодий ривожланиш вазирлиги 6 минг километрлик трансконтинентал магистраль лойиҳасини таклиф этган эди, ундан 102 километри бўғоз остида ўтиши керак бўлган.
Энди эса бу ғоя яна кун тартибига чиқди. 2025 йил 15 август куни Аляскада Владимир Путин ва Доналд Трампнинг учрашуви чоғида Дмитриев “Евроосиё ва Америка ўртасидаги янги дунё кўприги” бўлиши мумкин бўлган лойиҳа режасини тақдим этди.
Шу тариқа, Беринг бўғози орқали Россия ва АҚШни боғлайдиган туннель лойиҳаси нафақат муҳандислик жиҳатидан, балки геосиёсий рамз сифатида ҳам катта қизиқиш уйғотмоқда. Мутахассислар бу ташаббусни XXI асрнинг энг ноодатий транспорт иншоотларидан бири сифатида баҳоламоқда.
“Zamin”ни Telegram'да ўқинг!
