Жанубий Африкада бўлиб ўтадиган навбатдаги G20 саммитида анъанавий таркибдан кескин фарқ қиладиган вазият кузатилмоқда. Хитой Ташқи ишлар вазирлигининг 13 ноябрь куни эълон қилишича, мамлакат номидан саммитда давлат раҳбари Си Жинпинг эмас, балки давлат кенгаши бош вазири Ли Цян иштирок этади.
Маълум қилинишича, ЖАР ҳукуматининг расмий таклифига асосан Ли Цян 21–23 ноябрь кунлари Йоҳаннесбург шаҳрида ўтадиган «Йигирматалик гуруҳи» саммитида Пекин номидан қатнашади. Бу унинг G20 саҳнасидаги иккинчи иштироки: ўтган йили Нью-Деҳлида ўтган саммитда ҳам айнан у Хитой делегациясига раҳбарлик қилган эди.
Бироқ бу йилги йиғилишнинг энг диққатга сазовор жиҳати — 2008 йилдан буён биринчи марта G20’нинг учта энг йирик иштирокчи давлати раҳбарларисиз ўтказилаётганидир. АҚШ президенти Доналд Трамп ва Россия раҳбари Владимир Путин саммитда қатнашишдан бош тортди.
Трамп бунга ЖАР ҳукуматининг «мутлақо ёмон сиёсат» юритиши сабаб бўлишини айтган ва АҚШ бу саммитда умуман қатнашмаслигини билдирган. Ундан олдинроқ, Сирил Рамафоса Оқ уйга қилган ташрифи давомида Трамп уни ЖАРда «оқ танли фермерларни оммавий ўлдириш»да айблаб, кескин баёнот бергани ҳам ёдда.
Москва томонидан эса Кремль матбуот котиби Дмитрий Песков Путин саммитга шахсан бормаслигини, лекин Россия делегацияси «лозим даражада» қатнашишини маълум қилган.
Шу тариқа, Йоҳаннесбург саммити глобал сиёсий саҳнадаги етакчилар алмашинуви, давлатлар ўртасидаги муносабатларда янгича динамика ва катта кучлар форматининг ўзгариб бораётганини яна бир бор намоён қилмоқда.
Саммитда Ли Цяннинг иштироки Пекиннинг глобал мулоқотдаги мавқеини сақлаш, иқтисодий ва геосиёсий алоқаларда барқарор иштирокни давом эттириш ниятини кўрсатади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
