Россия ҳарбий авиациясида ноёб ўрин тутган Ан-22 турбовинтли гиганти яна бир бор ёдга олинди – бу гал фожиали сабаб билан. 9 декабрь куни таъмирдан кейинги синов парвози давомида ушбу улкан самолёт Иваново области ҳудудида қулади. Ҳодиса Россия Мудофаа вазирлигини ҳам, авиация мухлисларини ҳам жиддий хавотирга солди.
Вазирликнинг расмий баёнотига кўра, самолёт одамлар яшамайдиган ҳудудга тушган. Қидирув-қутқарув отрядлари дарҳол фаоллаштирилган ҳамда экипаж аъзолари тақдири бўйича маълумот тўплаш учун ҳодиса жойига йўл олган. ТАСС манбаси маълум қилишича, бортда етти киши бўлган.
60 йиллик гигантнинг сўнгги парвози
Ан-22 «Антей» — совет даврининг энг улкан ва энг кучли турбовинтли ҳарбий-транспорт самолёти ҳисобланади. У ишлаб чиқарилган кунларидан бери оғир юклар ташиш, узоқ рейсларда хизмат қилиш, қийин ландшафтларда қўниш каби вазифаларни муваффақиятли бажариб келган.
2025 йилда ушбу моделнинг илк парвоз қилганига 60 йил тўлди. Аммо техника қанчалар мустаҳкам бўлмасин, унинг эксплуатацияси чексиз эмас – Россияда фойдаланишда қолган охирги Ан-22 ҳам навбатдаги регламент таъмиридан сўнг синов парвозга чиққан пайтда ҳалокатга учради.
«Коммерсант» маълумотларига кўра, самолёт «ҳавода тўсатдан бўлиниб кетган». Фюзеляж парчалари Иванково қишлоғи яқинидаги сув омборига қулаган.
Нимага бу самолёт тарихий аҳамиятга эга?
BBC ҳарбий таҳлилчиси Павел Аксёнов Ан-22нинг авиациядаги ўрнини қуйидагича таърифлайди:
- У узоқ вақт дунёдаги энг йирик ҳарбий транспорт самолёти бўлиб қолди.
- Ҳали ҳам энг катта турбовинтли ҳаво кемаси сифатида рекордни сақлаб турибди.
- Юк кўтариш ҳажми юқори бўлса-да, замонавий Ан-124 ва Ил-76МФ каби янги авлод машиналари унинг вазифаларини босиб ўтган.
- Қийин тайёрланган қўниш йўлакларига тушиш қобилияти — унинг энг ноёб жиҳатларидан бири.
Бироқ Россия ҳарбий паркида ўрта ва енгил классдаги транспорт самолётлари етишмаслиги сабабли, Ан-22 каби катта моделлар хизмат муддати неча бор узайтирилган. Амалда эса уларнинг кўпчилиги музей экспонатларига айланиши керак бўлган техникалар ҳисобланади.
Ҳалокатнинг сабаблари — ҳали ноаниқ
Ҳозирча ҳалокатга нима олиб келгани аниқланмаган. Шунга қарамай, экспертлар 50–60 йиллик хизмат давомида самолёт конструкциясидаги табиий эскириш, метал чарчаши ва агрегатлар ишлаш ресурсининг тугаши эҳтимолини асосий версиялар қаторига қўшмоқда.
Тергов расмий хулоса бергунига қадар жамоатчиликда саволлар кўп:
— Нега бундай ёши катта техникалар ҳали ҳам парвозда?
— Техник хулосалар тўлиқ бажарилганми?
— Бу Россия ҳарбий-транспорт авиацияси учун қандай хатарлардан дарак?
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
