Филу лақабли мушук беш ойда 250 километр йўл босиб уйига қайтди

Испаниядан Франциягача бўлган узун масофа — одам учун ҳам оғир, мушук учун эса ҳақиқий мўъжиза. Аммо Филу лақабли мушук айнан шундай ишни амалга оширди: у 250 километрга яқин йўлни босиб ўтиб, ўз уйи жойлашган Францияга қайтиб келган. Бу ҳақда France Info хабар бермоқда.

Маълум қилинишича, Филунинг эгалари Эвелин ва Патрик Сир ёзда фарзандлари билан Испанияга дам олиш учун борган. Таътил якунлангач, оила ўтган йил августида ўзлари яшайдиган Олонзак коммунасига қайтиш учун йўлга чиққан.

Йўлда улар бензин қуйиш учун бир шохобчага тўхтаган. Шу пайтда Филу қандайдир вазиятда машинадан тушиб қолган. Энг аламлиси — оила бу ҳолатни дарҳол пайқамаган. Фақат кейинроқ, йўлда анча узоқлаб кетгач, мушук йўқлигини билиб қолишган.

Шошилинч равишда орқага — тўхтаган бензин қуйиш шохобчасига қайтишган. Аммо ўша ерда ҳам Филудан дарак бўлмаган. Қидирувлар натижа бермаган ва оила мушук йўқолиб қолган, деган оғир фикр билан уйига қайтган.

Орадан бутун беш ой вақт ўтди. Ҳеч қандай янгилик бўлмади. Аммо кутилмаганда, Олонзак коммунасида яшайдиган Элен исмли аёл оилага қўнғироқ қилди.

Аёлнинг айтишича, у 9 декабр куни Филуни ўз ҳовлисида кўриб қолган ва раҳми келиб, уни уйига олиб кириб парвариш қила бошлаган. Мушук шу ерда озиқланиб, паноҳ топган.

Бир куни Элен Филу йўталаётганини пайқаб қолади ва уни ветеринарга олиб боради. Текширув пайтида мутахассислар мушукда махсус чип борлигини аниқлашган. Чипдаги маълумотлар орқали эгаларининг контакти чиқиб, Элен Эвелин ва Патрик билан боғланган.

Шу тариқа, йўқолган деб ўйланган Филу ўз уйига қайтди.

Энг қизиқ жиҳати — мушук 250 километр масофани қандай қилиб босиб ўтгани ҳалигача сирлигича қолмоқда. У йўлни якка ўзи топганми, бирор транспортга “илиниб” ўтганми ёки одамлар ёрдам берганми — бу ҳақда аниқ маълумот йўқ.

Бир нарса аниқ: Филу ўз уйига қайтишда ирода ва “уй ҳисси”нинг нималигини бутун дунёга яна бир бор исботлаб қўйди.