Лондон шошилинч тарзда Украинага Буюк Британияда ишлаб чиқарилган қўшимча 1000 та ракета ва 500 млн фунт стерлингдан ортиқ қийматдаги ҳаво мудофааси воситаларини ажратади. Бу пакет, расмий изоҳга кўра, Россиянинг энергия инфратузилмаси ва турар жойларга қаратилган зарбаларидан ҳимояланишни кучайтиришга қаратилган.
Энг катта урғу ҳаво ҳимоясига қаратилган: маблағнинг 150 млн фунт қисми PURL доирасида йўналтирилади. Мазкур механизм орқали НАТО мувофиқлаштирган ҳолда АҚШдан ҳаво мудофаасига зарур “интерсептор”лар ва бошқа юқори устувор воситалар тезкор харид қилинади, деган тушунтириш берилган.
Пакетнинг яна бир “оғир қисми” — Белфастда ишлаб чиқарилаётган енгил кўп мақсадли LMM ракеталари. Ресмий маълумотда айнан шу 1000 та LMM етказиб беришга 390 млн фунт сарфланиши айтилган. Яъни бу ерда гап “бирорта рамзий ёрдам” ҳақида эмас, осмонни ёпишга қаратилган катта партия ҳақида кетяпти.
Бундан ташқари, яқин ойларда Буюк Британия Air Defence Consortium орқали Киевга қўшимча 1200 та ҳаво мудофааси ракетаси ва 200 000 та артиллерия ўқ-дориси ҳам етказиб беришини билдирган. Демак, пакет “бугунги кун учун” ҳам, “эртанги темпни ушлаб туриш учун” ҳам ҳисоблаб чиқилган.
Шу хабар фонида 12 февраль куни Брюссельда, НАТО штаб-квартирасида Украина мудофааси бўйича алоқа гуруҳининг 33-йиғилиши ўтказилгани айтилади. Унга Буюк Британия томонидан Жон Хили ҳамраислик қилган, Германия томонидан эса Борис Писториус иштирок этган. Йиғилишда Украина мудофаа вазири Михаил Федоров, НАТО бош котиби Марк Рютте ҳамда Австралия бош вазири ўринбосари Ричард Марлз қатнашгани ҳам қайд этилган.
Муҳокамалар 2026 йил учун Украинанинг асосий ҳарбий эҳтиёжлари, фронтдаги вазият, келгуси етказиб беришлар ва “қайси жойда бўшлиқ бор” деган савол атрофида айланган. Яъни масала фақат “қанча юбордик” эмас — “нимани, қачон ва қай тарзда” деган режалаштириш.
Бу ерда PURL алоҳида аҳамият касб этяпти: Reuters’нинг ёзишича, яқиндаги учрашувлар олдидан Мэттю Уитакер ҳам аъзо давлатлар ушбу ташаббус доирасида янги мажбуриятлар олишини кутганини айтган, НАТО эса дастурга турли давлатлардан юзлаб миллион доллар миқёсида қўшимча ваъдалар борлигини билдирган.
Хулоса оддий: қишнинг қаттиқ пайтида энергетика объектлари ва шаҳарларга босим кучайганда, ҳаво мудофааси “люкс” эмас — тирик қолиш инфратузилмаси. Шунинг учун Лондон чиқарган пакет ҳам, Брюсселдаги учрашув ҳам битта нарсани кўрсатяпти: иттифоқчилар ёрдамни “оддий сиёсий баёнот” даражасида эмас, аниқ ҳисоб-китоб ва логистика даражасида давом эттирмоқчи. Reuters манбалари қайд этганидек, бу музокараларда Европанинг ўз хавфсизлиги учун ҳам янада фаолроқ роль олиши масаласи ҳам кун тартибида турган.
“Zamin”ни Telegram'да ўқинг!
