Россиялик парашютчи янги жаҳон рекордини ўрнатди

Россиялик парашютчи Сергей Бойтсов ҳаво шаридан стратосферадан сакраш бўйича янги жаҳон рекордини қайд этди.

Gazeta.ru хабарига кўра, спортчи Олтой ўлкасида 11 минг 551 метр баландликдан парашют билан сакраган. Эркин тушиш вақтида унинг тезлиги соатига қарийб 500 километрга етган. Сакраш амалга оширилган баландликда ҳаво ҳарорати минус 59 даражани ташкил этган.

Бойтсовнинг парашюти 1 минг 565 метр баландликда муваффақиятли очилган. Шундан сўнг у Олтой ўлкасининг Уст-Кальман туманига эсон-омон қўнган.

Аввалги рекорд полшалик парашютчиларга тегишли бўлиб, улар 10 километрдан юқори баландликдан сакрашни амалга оширган эди.

Янги рекордга тайёргарлик давомида Бойтсов 12 километр баландликдаги шароитни тақлид қилувчи барокамера синовларидан ўтган. Унинг махсус жиҳозлари эса минус 60 даражагача бўлган ҳароратда текширилган.

Қайд этилишича, рекорд ўрнатилган сакраш сентябрь ойида Екатеринбургда бўлиб ўтадиган Халқаро ёшлар фестивалига бағишланган.