Дунёда биринчи марта cаратонга чалинган илон даволанди

Буюк Британиядаги Честер ҳайвонот боғида 23 ёшли йирик питон дунёда илк бор илонларда қўлланилган ноодатий саратон даволаш усули — электрокимётерапиядан ўтказилди.

Жодей Фостер деб номланган 4,5 метрлик, 50 килограмм оғирликдаги тўрсимон питоннинг иштаҳаси пасайиб, ҳаракатчанлиги сезиларли даражада камайганидан сўнг ветеринарлар уни текширди. Натижада унинг жағида хавфли ўсма — фибросаркома аниқланди.

Дастлаб ўсма жарроҳлик йўли билан олиб ташланган бўлса-да, кейинчалик яна пайдо бўлиб, жағ суягини зарарлай бошлаган. Бу эса илоннинг ҳаётига жиддий хавф туғдирган. Шу сабабли ветеринарлар саратон мутахассислари билан ҳамкорликда инсонларда ҳам қўлланадиган электрокимётерапия усулини Жодей учун мослаштиришга қарор қилди.

Илоннинг катта ҳажми сабабли операция учун иккита стол бирлаштирилиб, тахминан икки кишилик каравотдек майдон тайёрланган. Жодей аввал ўз вольерида ухлатилган, сўнг ветеринария марказига олиб борилган. Қарийб 90 дақиқа давом этган муолажа жараёнида ўсма ва зарарланган жағ суягининг бир қисми олиб ташланган.

Шундан кейин саратон ҳужайраларининг қолган қисмини йўқ қилиш мақсадида электрокимётерапия ўтказилган. Ушбу усулда блеомицин дориси ва махсус электр импульслари биргаликда қўлланади. Электр таъсири саратон ҳужайраларининг ўтказувчанлигини вақтинча ошириб, дори воситасининг уларга самаралироқ киришига ёрдам беради.

Муолажадан бир неча ой ўтгач, Жодей Фостер яна одатдагидек овқатлана бошлаган ва фаоллиги тикланган. Ветеринарлар унинг зарба бериш, ўлжага маҳкам ёпишиш ва овқатни ютиш қобилияти ҳам сақланиб қолганини қайд этди.

Жорий ҳафтада ўтказилган якуний текширувда эса саратон қайта пайдо бўлганига ҳеч қандай белги аниқланмади.

Мутахассисларнинг таъкидлашича, бу илонларда электрокимётерапиядан фойдаланиш бўйича маълум бўлган биринчи ҳолатдир. Тадқиқотчилар ушбу тажриба ҳақидаги маълумотларни расмий эълон қилиб, келажакда бошқа ҳайвонларни даволашда ҳам мазкур усулдан фойдаланиш имкониятларини ўрганмоқчи.