Таиландда раҳбаридан норози аёл ўзи ишлаган компаниянинг нефть омборини ёқиб юборди

^{Фото: Chiang Rai Times}
Таиландда ўзи ишлаган нефть ҳамда кимёвий воситалар сақланадиган омборга ўт қўйган 38 ёшли аёл ҳибсга олинди. Бу ҳақда Chiang Rai Times хабар берган.

Кузатув камералари омборга ўт қўйилган вазиятни қайд этган. Компаниянинг омборга масъул бўлинмасига раҳбарлик қилган Энн Срия айбига иқрор бўлиб полицияга келган ва ушбу ҳаракат қасос олиш учун қилинганини айтган. Аёлнинг сўзларига кўра унинг бошлиғи доимий равишда унга танбеҳ бериб келган.

Аёл бир қаватли омборни ёқиб юборган вақтида ичкарида минглаб галлон нефть ва кимёвий моддалар бўлган.

Омбордаги кимёвий моддалар олов таъсирида тезлик билан атрофга тарқалган ва бино атрофида заҳарли тутун ҳосил қилган.

Ёнғин чиққан жойда 40 нафар қутқарув автомобили ишлаган. Ҳодиса оқибатида жабрланган компанияга жами 40 миллион бат (тахминан 1,18 миллион АҚШ доллари миқдорида) моддий зарар етказилган. «Замин»ни Telegram’да ўқинг!