АҚШ Ғазначилик котиби Скотт Бессент жума куни Рейган миллий иқтисодий форумида чиқиш қилиб, Эроннинг тахминан 1 миллиард доллар миқдоридаги крипто активлари қўлга олинганини маълум қилди. Бессентнинг сўзларига кўра, баъзи ҳамён эгалари маблағлари йўқолганини ҳали ҳам сезмаган бўлиши мумкин. "Биз уларнинг крипто ҳамёнларини тўғридан-тўғри эгаллаб олдик. Баъзилар ҳозирда тизимга киришга уринаётган бўлиши ва ҳамёнлари қўлга олинганини ҳали тушунмаган бўлиши мумкин", — дея қўшимча қилди у. Бу ҳақда Cointelegraph.com хабар беради.
Ушбу мусодара жараёни АҚШнинг Эронга нисбатан молиявий босим ўтказишга қаратилган "Оператион Экономик Фурй" (Иқтисодий ғазаб операцияси) доирасида амалга оширилди. 2025-йил март ойида бошланган ушбу операция Эрон активларини бир неча йўналишда нишонга олган: Bitcoin ва бошқа криптовалюталарни мусодара қилиш, банк ҳисобларини музлатиш ҳамда Европа иттифоқчилари билан ҳамкорликда кўчмас мулкларни тортиб олиш шулар жумласидандир.
Скотт Бессентнинг таъкидлашича, Эрон иқтисодиёти ҳозирда оғир аҳволда. Мамлакатда инфляция 200 фоиздан ошган, озиқ-овқат ваучерлари тарқатилмоқда ва интернет ўчириб қўйилган. Шунингдек, Эрон қўшинларининг 40-50 фоизи маош олмаётгани айтилмоқда. Ғазначилик котибига кўра, АҚШ аралашувига қадар режим ҳар ой 400-500 миллион долларни ўзлаштириб, ушбу маблағларни 80 га яқин раҳбарлар ўртасида тақсимлаб келган.
Янги эълон қилинган 1 миллиард долларлик кўрсаткич апрель ойи охирида эълон қилинган 500 миллион доллардан икки баравар кўпдир. Бу орада Эрон Ҳормуз бўғозини назорат қилиш орқали Bitcoin асосидаги суғурта моделини жорий этишни режалаштирмоқда. "Ҳормуз Сафе" деб номланган платформа орқали рақамли денгиз суғуртасини Bitcoin'да сотиш ва блокчейн орқали ҳисоб-китоб қилиш кўзда тутилган бўлиб, бу мамлакатга 10 миллиард доллардан ортиқ даромад келтириши тахмин қилинмоқда.
“Zamin”ни Telegram'да ўқинг!
