Муниса Ризаева янги клипида мухлисларни ажаблантиришга тайёрланмоқда! (видео)

Ўзбекистоннинг севимли хонандаси Муниса Ризаева ҳар галгидек мухлисларини ҳайратга солиш учун навбатдаги янгилик билан чиқиш қилмоқда. Бу сафар хонанда нафақат янги қўшиғи билан, балки тубдан ўзгарган имижи билан ҳам ҳамманинг эътиборини ўзига жалб қилди.

Ижтимоий тармоқдаги видеомурожаатида хонанда янги клипини тасвирга олаётганини маълум қилиб, бу клипни одатдагидан мутлақо фарқли ва ўзига хос бўлишини таъкидлади.

"Биз ҳозир тасвирга олиш жараёнидамиз ва бу қандай бўлишини ҳатто ўзим ҳам тасвирлаб бера олмайман. Сизларни олдин ҳеч кўрмаганингиздек ажойиб, бошқача клип кутмоқда. Бизларни кузатиб боринг!" – деб мухлисларига самимий ва қувноқ мурожаат қилди хонанда.

Муниса ушбу мурожаатида ўзининг пуштиранг соч турмаги билан ҳам мухлисларини ҳайратда қолдирди. Уни бу янги, ёрқин кўринишда кўрган мухлислари ижтимоий тармоқларда бу ҳақдаги қизғин муҳокамаларни бошлаб юборишди.

Бу янгича образ хонанданинг ижодий изланишлари ва янги экспериментлари давом этаётганидан далолат беради. Кўриниб турибдики, хонанда ўзининг нафақат мусиқий ижодида, балки образида ҳам доим янгилик ва ўзгаришларга интилади.

Ҳозирча янги клип қачон намойиш этилиши аниқ эмас, лекин хонанда ваъда қилганидек, бу клип ҳар бир мухлиснинг ёдида қоладиган даражада таъсирли ва ёрқин бўлиши кутилмоқда. Демак, кутишга арзийди!

Муниса Ризаева яна бир бор ўзининг ёқимли оҳанги, самимий табассуми ва ўзгача образи билан мухлислари қалбидан жой олишга шай! «Замин»ни Telegram’да ўқинг!