Ижтимоий тармоқларда катта машҳурликка эришган “Афандининг қизлари” гуруҳи нега фаолиятини тўхтатгани кўпчилик мухлисларни қизиқтирмоқда. Ўзига хос ҳазиллари, ҳаётий видеолари ва уч қизнинг турли характерларини ёрқин намоён этган роликлари билан танилган жамоа қисқа вақт ичида интернет фойдаланувчиларининг севимли гуруҳларидан бирига айланган эди.
Гуруҳ таркибида Нигора Абдуллахонова, Нигина Жабборова ҳамда Муборак Абдуллаева фаолият юритган. Уларнинг видеоларида уч опа-сингилнинг турфа феъл-атвори, ҳаётий вазиятлардаги муносабати ва ҳазиломуз чиқишлари акс этар, томошабинлар эса ушбу роликларда ўзини кўра оларди. Шу сабабли ҳам гуруҳ видеолари миллионлаб кўришлар тўплаб, ижтимоий тармоқларда кенг оммалашган.
Айниқса, кундалик ҳаётда учрайдиган ҳолатларни содда ва самимий тарзда етказиб бериши Афандининг қизларига катта аудитория олиб келган. Кўпчилик уларни ҳақиқий опа-сингиллардек қабул қилиб, янги видеоларини интизорлик билан кутиб борган.
Бироқ вақт ўтиб гуруҳ фаолияти тўхтади. Бу ҳақда Муборак Абдуллаева интервьюларидан бирида фикр билдириб, ҳар бир нарсанинг якуни бўлиши табиий эканини айтган.
Шундан сўнг мухлислар орасида турли тахминлар пайдо бўлганига қарамай, гуруҳ аъзолари ўртасида жиддий келишмовчилик бўлмагани айтилмоқда. Бугун ҳам Афандининг қизлари видеолари ижтимоий тармоқларда қайта-қайта тарқалиб, мухлисларга кайфият улашишда давом этмоқда.
“Zamin”ни Telegram'да ўқинг!
