Мерилин Монро образидаги янги Barbi қўғирчоғи сотувга чиқди

Mашҳур актриса Мерилин Монронинг ёрқин образларидан бири энди Barbi қўғирчоғида акс этди. Mattel компанияси актрисага бағишланган янги Marilyn Monroe Barbie Signature Doll моделини тақдим қилди. Қўғирчоқ 18 августдан харидорларга таклиф этила бошланган.

Янги модель Монронинг 1953 йилда суратга олинган “Жентлменлар сарғишларни афзал кўрадилар” фильмидаги машҳур қиёфаларидан бирини такрорлайди. Актриса фильмдаги саҳналарнинг бирида “Diamonds Are a Girl’s Best Friend” қўшиғини ёрқин пушти рангдаги, катта бант билан безатилган кўйлак ва узун опера қўлқопларида ижро этган. Қўғирчоқ ҳам айнан шу эсда қоларли образ асосида яратилган.

Marilyn Monroe Barbie Signature Doll актрисанинг таваллудининг 100 йиллиги муносабати билан ишлаб чиқарилган бўлиб, унинг нархи 81 долларни ташкил этади. Шу тариқа, Мерилин Монронинг кино тарихида қолдирган машҳур образларидан бири коллекцион Barbi кўринишида яна бир бор мухлисларга тақдим этилди.

Mattel компанияси Мерилин Монро образидаги қўғирчоқларни 1990 йиллардан бери ишлаб чиқариб келади. Хусусан, 1997 йилда компания актрисанинг энг таниқли қиёфаларига бағишланган учта Barbi моделини тақдим этган. Улар “Жентлменлар сарғишларни афзал кўрадилар” фильмидаги пушти ва қизил либослар ҳамда “The Seven Year Itch” фильмидаги машҳур оқ кўйлакдан илҳомланган.

Компания 2002 йилда ҳам Монронинг яна бир машҳур образини Barbi орқали қайта тиклаган. Унда актрисанинг АҚШ президенти Жон Кеннедининг туғилган куни муносабати билан ўтказилган тадбирда “Happy Birthday, Mr. President” қўшиғини ижро этган пайтдаги қиёфаси акс эттирилган.

2009 йилда эса Mattel “Жентлменлар сарғишларни афзал кўрадилар” фильмидаги Монронинг яна бир образи асосида Barbi қўғирчоғини ишлаб чиқарган. Бу сафар актрисанинг олтин рангли кўйлакдаги қиёфаси асос қилиб олинган.

Янги қўғирчоқ эса Мерилин Монронинг энг машҳур экран образларидан бирини замонавий коллекцион Barbi шаклида қайта намоён этиб, актриса ижоди мухлислари учун ўзига хос эсдаликка айланди.