Трамп: "Дўстлик мақсадида чўзилган қўлни рад этсангиз, жавобимиз кескин бўлади"

АҚШ президенти Дональд Трамп Эрон билан муносабатларни яхшилаш ниятида эканлигини билдирди. Унинг айтишича, Вашингтон ҳарбий можароларни ортда қолдиришга тайёр ва икки давлат ўртасида ҳамкорлик эшикларини очишни мақсад қилган.

Трампнинг Эронга мурожаати

Дональд Трамп Эронга йўллаган мактубида шундай таъкидлади:
"Мен бу мактубни янги сарҳадларни очиш мақсадида ёзяпман. Ҳарбий ҳаракатларни ортда қолдириш вақти келди. Биз санкцияларни олиб ташлашимиз ва икки давлат ўртасидаги ҳамкорлик эшикларини очишимиз мумкин."

Бироқ, президент ўз мурожаатида Эронни оғохлантиришни ҳам унутмади:
"Биз сизни огоҳлантирамиз: агар дўстлик мақсадида чўзилган қўлни рад қилсангиз, бизнинг жавобимиз кескин бўлади."

Эрон ва АҚШ ўртасидаги муносабатлар

Вашингтон ва Теҳрон ўртасидаги муносабатлар охирги йилларда кескинлашиб кетган. АҚШ бир неча бор Эронга қарши иқтисодий санкциялар жорий қилган ва Эронни хавфли геосиёсий ҳаракатларда айблаган. Шунингдек, Эрон АҚШ билан дўстона муносабатда бўлмаган 43 мамлакат рўйхатига киритилган.

Футбол ва сиёсат: Эроннинг ЖЧ-2026 даги иштироки сўроқ остида

Сўнгги вақтларда Эрон миллий терма жамоасининг 2026 йилда АҚШ, Мексика ва Канадада бўлиб ўтадиган Жаҳон чемпионатида иштирок этиши масаласи муҳокама қилинмоқда. Сабаби, Эрон АҚШ билан ёмон муносабатда бўлган давлатлар рўйхатига киритилган.

Шу билан бирга, Эрон терма жамоаси аллақачон ЖЧ-2026 учун йўлланмани қўлга киритган ва унинг чемпионатда иштирок этиши расман бекор қилинмаган.

Дональд Трампнинг ушбу баёноти Эрон ва АҚШ ўртасидаги кескин муносабатларни юмшатишга қаратилган жиддий қадам бўлиши мумкин. Бироқ, Теҳроннинг бу таклифга қандай жавоб қайтариши ҳозирча номаълум. Агар АҚШ ва Эрон ўртасидаги муносабатлар яхшиланмаса, бу нафақат сиёсий, балки спорт соҳасида ҳам жиддий оқибатларга олиб келиши мумкин. “Замин” янгиликларини “Telegram”да кузатиб боринг