Ўзбекистон бокси янги юлдузга эга: Руслан Абдуллаев фахрли ғалабани нишонлади! (видео)

20 апрель куни АҚШда бўлиб ўтган бокс оқшомида ўзбекистонлик ёш ва истеъдодли боксчи Руслан Абдуллаев профессионал карьерасидаги иккинчи жангини ўтказди ва филиппинлик рақиби Жино Родригони мағлуб этиб, муҳим ғалабани қўлга киритди.

Жанг "Golden Boy" промоутерлик компанияси томонидан ташкил этилди ва 8 раунд давомида асосан Абдуллаевнинг устунлиги остида кечди. Унинг тезлиги, техникаси ва кучли зарбалари томошабинларни ҳайратга солди. Ҳаққоний ва қизиқарли кечган жанг якунида ҳакамлар бир овоздан 80-71 ҳисобида Русланнинг ғалабасини эълон қилишди.

Бу ғалаба билан Руслан Абдуллаев WBA супер енгил вазн тоифасида "Continental Americas Gold" чемпионлик камарини эгаллади. Шу тариқа у профессионал рингдаги иккинчи жангидаёқ ўзбек бокс мухлисларига катта умид бағишлади.

Эслатиб ўтамиз, март ойида дебют жангини мексикалик рақиби Хосе Валензуела Алварадога қарши ўтказиб, нокаут билан ғалаба қозонган Руслан, иккинчи жангида ҳам ажойиб кўриниш берди ва ўзининг катта потенциалини яна бир бор намоён қилди.

Рақиби Жино Родриго эса профессионал рингда 19 жанг ўтказган тажрибали боксчи бўлиб, 13 марта ғалаба қозониб, 4 марта мағлуб бўлган ва 2 марта дуранг қайд этган эди. Бу ғалаба Абдуллаевнинг профессионал рингдаги мавқеини янада кўтарди ва унинг келгуси катта жангларига ишонч уйғотди.

Руслан Абдуллаевнинг ғалабаси билан Ўзбекистон профессионал бокси яна бир янги юлдузга эга бўлди. Унинг келгусидаги жангларини интиқлик билан кутиб қоламиз! «Замин»ни Telegram’да ўқинг!