Арриго Сакки: «Анчелоттини танқид қилишдан олдин, у ким эканлигини эслашингиз керак!»

Италия футболининг афсонавий шахсларидан бири, «Милан»нинг собиқ бош мураббийи Арриго Сакки «Реал Мадрид» устози Карло Анчелотти ҳақидаги танқидларга жавоб берди. Маълумки, мадридликлар Чемпионлар лигасининг чорак финалида «Арсенал»га икки ўйин натижасига кўра (0:3 ва 1:2) мағлуб бўлиб, мусобақани тарк этган эди.

«Бу танқидчилар Анчелоттининг кимлигини ҳақиқатан ҳам биладиларми? У қандай совринларга эришганини англайдиларми? Мен уни фақат қўлга киритган совринлари учун эмас, балки инсон сифатидаги ажойиб фазилатлари учун ҳам ҳақиқий маэстро деб ҳисоблайман. Мадриднинг «Реал» клуби Карлетто каби буюк шахс билан хайрлашишдан олдин яхшилаб ўйлаб кўриши шарт», — деди Сакки машҳур «La Gazzetta dello Sport» нашрига берган интервьюсида.

Саккининг таъкидлашича, бу мавсум Анчелотти ва «Реал» учун жуда қийин кечди. Карло кўплаб асосий футболчиларнинг жароҳатлари туфайли деярли ҳар бир ўйинда таркибини қайта шакллантиришга мажбур бўлган.

«Футболда бу каби ҳолатлар содир бўлиб туради, аммо Карло каби буюк мутахассиснинг танқид қилиниши мени қаттиқ ранжитади. Унинг бу мавсумдаги таркибига назар ташланг – аксарият учрашувларда у ўз позициясидаги асосий ҳимоячиларсиз ҳаракат қилганини кўрасиз. Бу ҳам осон иш эмас ва ҳар қандай мураббий учун оғир синовдир», — деб қўшимча қилди машҳур мураббий.

Арриго Сакки ўз нутқида Анчелотти каби мураббийларнинг қадрини билиш ва уларнинг қийин вазиятлардаги фаолиятини адолатли баҳолаш кераклигини яна бир бор уқтириб ўтди. «Замин»ни Telegram’да ўқинг!