Абдуқодир Ҳусанов майдонсиз қолди: Ўзбекистонлик юлдузни нима кутаяпти?

Ўзбекистон миллий терма жамоаси марказий ҳимоячиси Абдуқодир Ҳусанов атрофидаги сўнгги янгиликлар футбол мухлисларини жиддий ўйга солди. "Манчестер Сити" сафидаги ўйин амалиёти бироз тўхтагани ва Гвардиола уни сўнгги учрашувларда майдонга туширмаётгани турли тахминларга сабаб бўлмоқда.

Февралдаги юлдуз, апрелда — захирада
Абдуқодир Ҳусанов февраль ойи давомида “Сити”нинг энг яхши ўйинчиларидан бири сифатида тилга олинганди. Бироқ 30 март куни “Борнмут”га қарши Англия кубоги беллашувида танаффусда алмаштирилганидан кейин у ҳалигача бирорта ўйинда иштирок этмади.

Унгача Абдуқодир “Сити” сафида АПЛ, Европа Чемпионлар Лигаси ва Кубок учрашувларида 9 та ўйинда қатнашиб, 1 та гол ҳам киритган эди. Лекин кейинги ҳафталарда у ички рақобатда Нико О’Райлига имкониятни бой бериб, асосий таркибдан четда қолди.

Гвардиоладан мунтазам мақтов эшитган ҳимоячининг бундай вазиятга тушиб қолиши кўпчилик учун кутилмаган ҳол бўлди.

Европа нашрлари вазиятга ойдинлик киритмоқда
Испаниянинг машҳур fichajes.net сайтида ёзилишича, “Манчестер Сити” раҳбарияти Абдуқодирни тажриба тўплаши учун ижарага юбориш имкониятини кўриб чиқмоқда.

“Ўзбекистонлик ҳимоячи ёзда жамоасини вақтинча тарк этиши мумкин. Унинг салоҳияти юқори, лекин ҳозирча жамоа марказида тўлиқ ўз ўрнини эгаллай олмади,” — деб ёзади нашр.

Хосеп Гвардиола ҳам бу ғояни маъқуллаган. Унинг фикрига кўра, ижара Абдуқодирга Европа темпига тўлиқ мослашиш ва янада бой тажриба тўплаш имконини беради.

Қизиқувчилар етарли, қарор муҳим
Абдуқодирга нафақат Англия Премьер-Лигаси клубларидан, балки бошқа етакчи Европа чемпионатларидан ҳам қизиқишлар мавжуд. “Сити” мутахассислари бу ижара футболчининг ўсиши ва келажакда жамоанинг марказий ҳимоя чизиғини мустаҳкамлашда муҳим омил бўлади, деб ҳисобламоқда.

“Ушбу ижара келишуви Ҳусановнинг келажакда “Сити”даги ролини янада мустаҳкамлаш учун муҳим қадам,” — дея таъкидлайди эксперти Начо Эстрелла Домингес-Момпель.

Абдуқодир ким? Эслатиб ўтамиз
Абдуқодир Ҳусанов 2023 йил ёзига қадар Франциянинг “Ланс” клуби шарафини ҳимоя қилган. “Манчестер Сити” уни 2024 йил 20 январь куни трансфер қилган.

Англия чемпиони унга жуда катта ишонч билдириб, 40 миллион евро трансфер тўлови ва 10 миллион евро бонус таклиф этган. Ҳозирда у “Сити” билан 2029 йилнинг ярмигача мўлжалланган шартномага эга.

Transfermarkt портали Ҳусановни 35 миллион евро баҳоламоқда. У бу билан Марказий Осиёдаги энг қиммат футболчи ҳисобланади.

Сиз нима деб ўйлайсиз — Абдуқодир “Сити” сафида қолиши керакми ёки вақтинча бошқа жамоада ўйнаб келса яхшироқми? Изоҳда фикрингизни қолдиринг! «Замин»ни Telegram’да ўқинг!