Симоне Инзаги «Милан»дан йирик мағлубиятдан сўнг мухлислардан узр сўради

Италия кубоги ярим финали доирасидаги Милан дербисида «Интер» рақиби «Милан»дан йирик ҳисобда (0:3) ютқазганидан кейин жамоа бош мураббийи Симоне Инзаги ўз фикрларини билдириб ўтди.

«Бу мағлубият учун барча мухлисларимиздан чин дилдан узр сўраймиз. Албатта, бугунги натижадан жуда афсусдамиз. «Милан» бугунги ғалабаси билан ҳурматга муносиб эканини яна бир бор исботлади. Биринчи бўлимдан кейин жамоамизнинг вазиятларидан ҳисоб очилиши керак эди, лекин бу амалга ошмади ва хафсаламиз пир бўлди», — дейди Инзаги.

Унинг сўзларига кўра, иккинчи бўлимдаги муваффақиятсизлик асосий ролни ўйнаган: «Иккинчи бўлимда бурчак зарбасидан гол ўтказиб юбордик, бу ҳолат жамоамизнинг руҳиятига салбий таъсир қилди. Шундан кейин ўйинимиз анча сустлашди. Ростини айтсам, биз кетма-кет икки учрашувда мағлуб бўлишга кўникиб қолмаганмиз. Шу сабабли, бу икки мағлубиятни жиддий таҳлил қилиб чиқишимиз лозим», — деб таъкидлади мураббий.

Шунингдек, у олдинги баҳс ҳақида ҳам фикр билдирди: «Аввалги турдаги «Болонья»га қарши учрашувда ҳам ютқазишимиз керак эмасди. Аммо бугун эса иккинчи бўлимда рақибимизга қарши етарли даражада жисмоний ва руҳий тайёргарлик билан чиқа олмадик. Агар Де Врей томонидан киритилган гол ҳисобга олинганида, балки ўйинни ўзгартириш мумкин бўларди. Лекин бу мавсумдаги сўнгги бешта дербида бизга қийинчилик туғдирган «Милан»нинг кучини тан олишимиз лозим», — дея қўшимча қилди Симоне Инзаги.

Эслатиб ўтамиз, жамоалар ўртасидаги илк баҳс 1:1 ҳисобидаги дуранг билан якунланганди. Лекин икки ўйин натижасига кўра, финалга чиқиш бахти «россонерилар»га насиб этди. Италия кубогининг ҳал қилувчи финал баҳсида «Милан» жамоаси «Болонья» — «Эмполи» жуфтлиги ғолиби билан тўқнаш келади. Финал учрашуви мухлислар томонидан катта қизиқиш билан кутилаяпти. «Замин»ни Telegram’да ўқинг!