Равшан Эрматов чемпион ўсмирларга: «Юлдузлик касалига чалинманг, машҳурликнинг дўсти йўқ!»

Ўзбекистон футбол ассоциацияси биринчи вице-президенти Равшан Эрматов Осиё чемпионатида ғолиб бўлган 17 ёшгача бўлган ўсмирлар терма жамоаси билан учрашув ўтказди. Учрашувда мураббийлар, футболчилар ва уларнинг ота-оналари ҳам иштирок этишди.

Сўзини илтимос билан бошлаган Эрматов ёш футболчиларни тарихдан сабоқ чиқаришга чақирар экан, аввалги футболчилар йўл қўйган хатоларни такрорламаслик кераклигини уқтирди.

«Сизлардан биргина илтимосим бор. Ўзимизда ўтган тарих, шунга ўхшаш мусобақаларда натижа кўрсатган футболчиларнинг тақдири бор. Ўша пайтда Жаҳон чемпионатига чиқиб, яхши натижалар кўрсатиб, автомобиллар совға қилинганини кўрганмиз. Аммо баъзи футболчилар ўша пайтда машина ҳайдаш, турли хил ўртоқлар орттириш билан овора бўлиб, натижада машғулотлар қолиб кетган. Шуни унутманг: машҳурликнинг ҳеч қандай дўсти бўлмайди. Агар атрофингларда шундай ёмон ўртоқлар пайдо бўлса, уларни дарҳол ўзларингдан узоқлаштиринг», – деди Эрматов.

Унинг таъкидлашича, спортчининг биринчи вазифаси – доимий меҳнат ва машғулот. Уларнинг вақтлари ҳар қандай зиёфат ёки ортиқча нарсалар учун сарфланмаслиги керак:

«Биз спортчимиз, вақтни бекорга ўтказмаслик керак. Бирор мақсадга эришиш учун бошқа нарсалардан воз кечишга тўғри келади. Ҳар бир дақиқа қадрлидир, вақт тез ўтиб кетади, унинг қадрини билиш лозим».

ЎФА биринчи вице-президенти фақат яхши тайёргарлик орқали келгусида янада катта ютуқларга эришиш мумкинлигини таъкидлади:

«Эртами-кечми буюк футболчиларга айланасизлар. Ҳатто ўз самолётларингиз ҳам бўлиши мумкин, лекин шу даражага етганингизда ҳам оёғингиз ердан узилмасин. Ҳеч қачон манманлик қилмасдан, доим оддийликни сақлаш зарур. Ана шунда Худо йўлларингизни очади. Агар оғир-босиқлик билан, мураббийингиз кўрсатган тактика ва маслаҳатларга амал қилиб иш тутсангиз, ҳеч қачон адашмайсизлар. Майдонда руҳан кучли эканлигингизни кўрсатдингиз, шу руҳият билан кейинги мусобақаларга тайёрланинг ва сизларга ҳеч ким қаршилик қила олмайди», – деди Эрматов.

Эслатиб ўтамиз, Ўзбекистон ўсмирлар терма жамоаси Осиё чемпионати финалида Саудия Арабистони жамоасини 2:0 ҳисобида мағлуб этиб, бош совринни қўлга киритди. Қайд этиш лозимки, Исломбек Исмоилов бошчилигидаги жамоанинг икки футболчиси биринчи таймнинг сўнгги дақиқаларида қизил карточка олиб, майдонни тарк этган эди. Шунга қарамай, ўсмирлар иккинчи бўлимда ғалабага бўлган кучли иродани намойиш этиб, рақиб дарвозасига икки бор гол уришга муваффақ бўлишди. «Замин»ни Telegram’да ўқинг!