Гвардиола: «Барселона»дек ўйнасангиз, стадионлар ҳеч қачон бўш қолмайди!

«Манчестер Сити» клуби бош мураббийи Пеп Гвардиола Чемпионлар лигаси ярим финали доирасида «Барселона» ва «Интер» жамоалари ўртасидаги ўйин (3:3) ҳақида ўз фикрларини билдириб ўтди. Испаниялик машҳур мутахассис собиқ жамоаси «Барселона»нинг ўйинини алоҳида мақтаб, натижадан қатъи назар каталонияликлар мухлисларнинг қалбини қозонганини таъкидлади.

«Агар сиз «Барселона» каби ҳужумкор ва очиқ футбол намойиш қилсангиз, стадионларингиз ҳеч қачон бўшаб қолмайди. Ўйин натижаси қандай бўлиши муҳим эмас, мухлисларнинг жамоаси билан қанчалик фахрланаётганини кўрсангиз бас. «Барселона» футболини яхши кўрадиган одамлар бугун яна бир бор жамоасидан мамнун бўлди», — деди Гвардиола.

Шу билан бирга, у «Интер» клубини ҳам эътибордан четда қолдирмай, рақибнинг кучли томонларини ҳам таъкидлаб ўтди. Мутахассис ўтган мавсум Чемпионлар лигаси финалида «Манчестер Сити» «Интер»ни мағлуб этганини ҳам эслаб ўтди.

«Интер» яна бир марта ўзининг кучли жамоа эканлигини исботлади. Бу биз ўтган мавсум Чемпионлар лигаси финалида енгган ўша бақувват, жисмонан кучли ва ажойиб ҳимояланувчи «Интер». Улар катта босим остида ҳам совуққонлик билан ўйнай олади», — дея қўшимча қилди Гвардиола.

Маълумки, «Барселона» ва «Интер» ўртасидаги илк ярим финал баҳси 3:3 ҳисобида дуранг билан тугади. Энди финал йўлланмасини қўлга киритиш учун ҳал қилувчи учрашув 6 майдан 7 майга ўтар кечаси Миланнинг «Жузеппе Меацца» стадионида бўлиб ўтади. Бу беллашувда мухлисларни яна бир қизиқарли ва шиддатли ўйин кутиб турибди. «Замин»ни Telegram’да ўқинг!