Ватиканнинг янги раҳбари Лев XIV футбол мухлиси бўлиб чиқди – Папанинг севимли клуби аниқланди!

Яқинда Ватикан тахтига ўтирган янги понтифик Лев XIV ўзининг диний фаолияти билан бир қаторда спортга бўлган муҳаббати билан ҳам жамоатчилик диққатини ўзига қаратди. Папанинг футболга бўлган чексиз иштиёқи ҳақида унинг яқин дўсти, епископ Жузеппе Пагано очиқлади.

Епископ Пагано италиялик ANSA ахборот агентлиги журналистларига берган интервьюсида Рим папасининг шу пайтгача номаълум бўлган қизиқишлари ва футболга бўлган ишқини айтиб ўтди.

«Лев XIV жуда кўп қизиқишларга эга инсон. У маданият, санъат билан бирга спортга ҳам катта иштиёқ билан қарайди. Айниқса, футболни севиб кузатади. Имконият пайдо бўлган пайтларда стадионга бориб, ўйинларни бевосита майдонда томоша қилишни афзал кўради», – деб таъкидлади епископ.

Жузеппе Паганонинг сўзларига кўра, понтифик кўп йиллардан бери Италиянинг «Рома» клубига мухлислик қилади. Унинг ушбу жамоага бўлган муҳаббати кўпчилик учун кутилмаган янгилик бўлди.

Шу билан бирга, «Рома» клуби ҳам янги сайланган Ватикан раҳбарининг ушбу клубга бўлган мухлислигини катта хурсандчилик билан қарши олган. Айни пайтда клуб раҳбарияти Лев XIV учун махсус тайёрланган, понтификнинг исми ёзилган футболкани совға қилишга тайёргарлик кўрмоқда.

Ушбу хабар Италия футболи ва Ватикан ўртасидаги муносабатларни янада яқинлаштириши кутилаяпти. Шу билан бирга, клуб раҳбарияти Лев XIV ни ўз уй ўйинларига таклиф қилиб, унинг стадионда меҳмон бўлиши учун барча шароитларни яратиб беришга тайёрлигини маълум қилди.

Папанинг футболга бўлган ишқибозлиги дунё бўйлаб миллионлаб футбол мухлислари учун ҳам қизиқ ва ажойиб янгилик сифатида қабул қилинди. Энди «Рома» клуби Лев XIV билан бирга нафақат Италияда, балки халқаро миқёсда ҳам янада катта шуҳрат қозониши эҳтимоли юқори. «Замин»ни Telegram’да ўқинг!