“Манчестер Сити”нинг гол машинаси саналган Эрлинг Холанд яқинда клуб сафини тарк этган бельгиялик плеймейкер Кевин де Брюйне ҳақида самимий фикрлари билан ўртоқлашди. Норвегиялик ҳужумчига кўра, жамоа афсонасининг йўқлиги кун сайин сезилмоқда.
– Кевин де Брюйне “Манчестер Сити”нинг ҳақиқий тимсоли, афсонаси ҳисобланади. Биз ҳар бир машғулот ва ўйинда уни соғинамиз. Жамоага унинг майдондаги ўйини ҳам, лидерлик фазилатлари ҳам етишмаяпти.
Мен яхши англайманки, бир кун келиб, мен ҳам унинг йўлидан кетаман. Чунки футболда абадий қолишнинг иложи йўқ. Аммо Кевиннинг жамоага берган ҳиссаси шунчалик каттаки, унинг ўрни бошқача туюлади, – деди Эрлинг Холанд ўз баёнотида.
Де Брюйне “Манчестер Сити” сафида 2015 йилдан 2025 йилга қадар ўн йиллик самарали фаолият олиб борди. Бу муддат мобайнида у жами 422 та расмий баҳсда майдонга тушиб, 108 гол муаллифига айланди ва 177 маротаба голли узатма амалга оширди.
Бельгиялик маҳоратли ярим ҳимоячи “Сити” таркибида Премьер-лига, Кубок ва халқаро мусобақаларда барча асосий совринларни қўлга киритди. Шу боис, унинг кетиши билан ҳосил бўлган бўшлиқ табиий ҳол сифатида қабул қилинмоқда.
Кевин де Брюйне эркин агент мақомига эга бўлганидан сўнг Италиянинг кучли жамоаларидан бири – “Наполи” билан икки йиллик шартнома имзолади. Энди у А Серияда ўз маҳорат ва тажрибасини намойиш этади.
Манчестер мухлислари эса унинг ўрнини тўлдириш осон эмаслигини яхши англаб туришибди. Чунки афсоналар кетади, аммо улар қолдирган хотира ва ютуқлар доим барҳаёт бўлиб қолади.
«Замин»ни Telegram’да ўқинг!
