Англия Премьер-лигасининг навбатдаги тури «Манчестер Юнайтед» учун яна бир омадсизлик билан якунланди. Португалиялик мураббий Рубен Аморим бошқарувидаги жамоа сафарда «Брентфорд»га қарши майдонга тушди ва 1:3 ҳисобида имкониятни бой берди.
Учрашув давомида манкунианликлар ўз ўйинини топа олмади, рақиб эса тезкор ва ҳужумкор услубда ҳаракат қилиб, устунликни қўлга киритди. Бу мағлубият «қизил иблислар» учун кетма-кет йирик йўқотишлардан бири бўлди.
Статистикага назар ташласак, «Манчестер Юнайтед» Аморим раҳбарлигида Англия чемпионатида 33 та баҳс ўтказган. Улардан атиги 9 тасида ғалаба қозонилган, 7 марта дуранг қайд этилган. Қолган 17 учрашувда эса рақиблар устун келган. Шу билан бирга, жамоа 39 та гол киритган бўлса, ўз дарвозасидан 53 та тўп ўтказиб юборган.
Шу каби салбий кўрсаткичлар мухлислар ва футбол экспертлари орасида катта танқидларга сабаб бўлмоқда. Бироқ клуб раҳбарияти ҳозирча сабр-тоқат билан иш тутиб, мураббийнинг истеъфосини муҳокама қилмаяпти. Манбаларнинг таъкидлашича, Аморимга жамоани тетиклантириш ва вазиятни тузатиш учун яна вақт берилади.
Англия Премьер-лигаси каби кескин рақобатли мусобақада бу кўрсаткичлар албатта жиддий таҳлил ва ўзгаришларни талаб этади. Аммо ҳозирча «Манчестер Юнайтед» раҳбарияти мураббийга ишонч билдиришда давом этмоқда.
«Замин»ни Telegram’да ўқинг!
