Миллий футбол марказида бўлиб ўтган ўртоқлик учрашувида Ўзбекистон ва Озарбайжон U-18 терма жамоалари яна бир бор майдонда тўқнаш келди. Бу сафар жамолиддин Раҳматуллаев шогирдлари ишончли ўйин намоён этиб, 3:1 ҳисобида ғалаба қозонди.
Беллашув бошиданоқ фаол ўтди — 16-дақиқада меҳмонлар сафида Шаҳисмаил Жафаров ҳисобни очди. Аммо ўзбекистонлик ёшлар жавоб зарбасини узоқ куттирмади. 25-дақиқада Қувончбек Абраев аниқ зарба билан ҳисобни тенглаштирди.
Иккинчи бўлимда ҳам ўзбек ёшлари устунликни қўлдан бермади — 57-дақиқада яна Абраев гол уриб дубл қайд этди ва жамоасини олдинга олиб чиқди. Учрашувнинг қўшимча дақиқаларида Диёр Тожибоевнинг голи ғалабани мустаҳкамлади — 3:1!
Жамоа бош мураббийи Жамолиддин Раҳматуллаев учрашувдан сўнг шогирдларининг руҳияти ва интизомидан мамнунлигини билдирди. Унинг таъкидлашича, бу ғалаба келгуси халқаро мусобақалар олдидан муҳим синов бўлди.
Қайд этиш керак, томонлар ўртасидаги илк баҳс 9 октябрь куни ўтган ва ўшанда дуранг — 0:0 натижа қайд этилган эди. Бу сафар эса Ўзбекистон ёшлари ўз сўзини айтди.
Ўртоқлик ўйини натижаси:
Ўзбекистон U-18 — Озарбайжон U-18 3:1
Голлар: Қувончбек Абраев (25, 57), Диёр Тожибоев (90+3) — Шаҳисмаил Жафаров (16).
Ўзбекистон U18: 1. Алишан Абдутолипов, 2. Шораҳим Шораҳмедов, 3. Озод Одилжонов, 4. Беҳруз Каримов, 5. Азизбек Тўлқинбеков, 7. Қувончбек Абраев, 8. Абдулфайз Бобомуродов, 11. Улуғбек Маратов, 14. Қуаниш Сайдалиев, 19. Муҳаммадали Дилшодбеков, 22. Даврон Тўлаганов.
Захирадагилар: 1. Акбар Машарипов, 21. Сиротилло Юсупхонов, 6. Беҳруз Эркинов, 9. Диёр Тожибоев, 10. Фазлиддин Омонкелдиев, 13. Диёрбек Тожиев, 15. Озодбек Нажмиддинов, 16. Шоҳжаҳон Абдуманнопов, 17. Жасурбек Жумабоев, 18. Абдулвосид Солиев, 20. Феруз Зоиров, 23. Саддам Аҳмадов.
Озарбайжон U18: 12. Айхан Аббосзода, 2. Сейди Данзиев, 3. Вусал Пашаев, 7. Зия Шакарханов, 11. Шаҳисмаил Жафаров, 13. Али Газибаев, 14. Алиакбар Ризазаде, 16. Муҳаммадали Маммадов, 17. Аҳмад Валиев, 19. Элтун Бабазада, 23. Рашад Алишов.
Захирадагилар: 1. Ҳабиб Ҳушанов, 4. Масуд Алишанли, 5. Жавид Маликов, 6. Тунжай Аҳмадов, 8. Анор Ҳусайнов, 9. Ниҳад Оружали, 10. Меҳди Муталлимли, 15. Омар Насибов, 18. Аҳлиман Сулаймонзода, 20. Мурад Маммадов, 21. Рауф Гафаров.
Мураббийлар фикрига кўра, ёш футболчиларнинг бу ғалабаси нафақат натижа жиҳатидан, балки руҳий жиҳатдан ҳам муҳим бўлди — жамоа бирлашган, ғалабага ишонч қайта тикланган.
“Zamin”ни Telegram'да ўқинг!
