Халқаро бокс ассоциацияси (IBA) Дубайда старт оладиган эркаклар ўртасидаги Жаҳон чемпионати таркибини расман эълон қилди. Унга кўра, жаҳон бўйлаб эътирофга эга бўлган, совриндорликда тенги кам топиладиган бир қатор машҳур чарм қўлқоп усталари рингга чиқиши аниқ бўлди. Мусобақа 2–13 декабрь кунлари бўлиб ўтади ва 2025 йилнинг энг шов-шувли спорт воқеаларидан бирига айланиши кутилмоқда.
Турнирнинг энг зўр интригалари орасида, аввало, Ўзбекистон бокс мактаби вакилларининг иштироки турибди. Миллий спортимиз шарафини ҳимоя қилаётган Ҳасанбой Дўсматов икки карра Олимпиада чемпиони ҳисобланади. Шу билан бирга, у амалдаги IBA версиясидаги жаҳон чемпиони сифатида ҳам мусобақанинг фаворитларидан бири саналади.
Унга ҳамроҳ бўлиб, Олимпиада ғолиби ва шунингдек IBA йўналишида жаҳон чемпиони бўлиб улгурган Абдумалик Ҳалоков ҳам Дубай рингида ўз маҳоратини намойиш этади. Ҳар икки ўзбекистонлик иштирокчи турнирда юқори мақсадлар билан иштирок этаётгани турган гап.
Озарбайжон терма жамоаси ҳам мусобақага жиддий таркиб билан келмоқда. Париж-2024 Олимпиада финалчиси Лорен Альфонсо Домингес ва IBA Жаҳон чемпионати финалчиси Саиджамшид Жафаров ушбу мамлакат сафидан рингга кўтарилади. Уларнинг ҳар иккаласи ҳам жаҳоннинг етакчи рақиблари орасида ўз ўрнига эга.
Шунингдек, Қозоғистон бокс мактаби вакиллари — Олимпиада финалчиси Нурбек Оралбай ва икки карра Осиё чемпиони Айбек Оралбай ҳам мусобақада иштирок этади. Улар ҳаваскор боксдаги ўзига хос услуби ва чидамлилиги билан кўпчиликнинг эътиборида.
Дубай рингининг энг катта сенсацияси эса шубҳасиз Куба боксининг тирик афсонаси — Хулио Ла Крус бўлади. У икки карра Олимпиада чемпиони ва беш бор IBA Жаҳон чемпиони бўлган ўта тажрибали ва бетакрор боксчи сифатида яна янги рекордлар сари интилади.
Турнир бир саҳнада бирлашадиган юлдузлар сони, уларнинг даражаси ва жангларга бўлган қизиқиш даражаси билан ҳаваскор бокс оламида катта шавқ уйғотган. Мутахассислар бу чемпионатни 2025 йилнинг энг кўп муҳокама қилинган мусобақаларидан бирига айланишига ишонмоқда.
Бокс вакиллари, спорт мухлислари ва мутахассислар учун эса Дубайдаги жанглар янги йил арафасидаги энг томошабоп ва қизғин воқеалардан бири бўлиши шубҳасиз.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
