Туркия Суперлигасининг 13-турида "Истанбул Башакшеҳир" ўз майдонида "Трабзонспор"га 3:4 ҳисобида имкониятни бой берди. Учрашувдан кейин "Башакшеҳир" бош мураббийи Нури Шахин ўйин ва аламли мағлубият ҳақида муносабат билдирди. Унинг фикрларида шогирдларига фахр ва ҳакамларга нисбатан кескин танқид мужассам бўлди.
Мураббий фахри
"Беллашувни икки қисмга бўлишимиз керак. Биз жуда яхши ўйинни бошладик. Аммо баҳс давомида 10 киши билан ҳаракат қилишимизга тўғри келди. 'Трабзонспор' каби кучли рақибга бир киши кам ўйнаб, 3 та гол уриш осон эмас. Мен футболчиларим билан фахрланаман," — деди Шахин ўз шогирдларининг кўрсатган мардлигини юқори баҳолаб.
Ҳакамларга кескин танқид
Шунингдек, у ўйин ҳакамларини ҳам кескин танқид остига олди: "Ҳакамлар ҳақида кўп гапирмоқчи эмасман. Менинг эътиборим асосан ўйин сифатини оширишга қаратилган. Аммо бугунги ҳакамлар билан ишлаш жуда қийин. Айрим хатолар сабаб биз бунинг зарарини кўряпмиз. Бу масала албатта кўриб чиқилиши керак. Лигамизда яхши футболчилар, яхши жамоалар, яхши клублар бор, лекин ҳакамлар даражаси ҳақида шундай деб айта олмайман. Бу менинг шахсий қарашим," — дея ўз норозилигини яширмади мураббий.
Маълумот ўрнида: ушбу клуб сафида тўп сураётган юртдошимиз Элдор Шомуродов чемпионат тўпурарлари рўйхатида 9 гол билан якка пешқадамлик қилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
