Европа футболининг энг кутилган кечаларидан бири — «Сантяго Бернабеу»даги «Реал» ва «Манчестер Сити» тўқнашувига саноқли вақт қолди. 10 декабрдан 11 декабрга ўтар тун соат 01:00 да старт оладиган ушбу жанг Чемпионлар лигаси умумий босқичининг марказий баҳси сифатида талқин этилмоқда.
Бу тўқнашувнинг яна бир муҳим жиҳати — ўтган мавсумдаги ўзаро ўйинлар тарихи. Ўшанда мадридликлар айнан мазкур босқичда «шаҳарликлар»ни мусобақадан чиқариб юборган ва жамоалар ўртасида жиддий интрига пайдо бўлган. Энди эса Хосеп Гвардиола бошчилигидаги «Сити» футболчилари реванш олишни мақсад қилган.
Ҳусановнинг ўтган мавсумдаги ўйини — мухлислар хотирасида
Ўтган йилги учрашув ўзбек футболи тарихида алоҳида из қолдирган. Мазкур баҳсда илк бор катта майдонга тушган ёш ҳимоячимиз Абдуқодир Ҳусанов Винисиус Жуниорни тўлиқ назорат остида ушлаб, мадридлик юлдузга деярли имконият қолдирмаганди.
Шундан сўнг ҳам экспертлар, ҳам фанатлар Абдуқодирнинг ўйинини юқори баҳолаб, уни «Сити» сафидаги энг ёрқин дебютлардан бири сифатида тилга олган. Айни пайтда эса навбатдаги муҳим баҳс арафасида жаҳон бўйлаб «Сити» мухлислари Гвардиоладан айнан Ҳусановни асосий таркибда кўришни талаб қилмоқда.
Мухлислар томонидан Ҳусановга бўлган катта ҳурмат
Клубнинг ижтимоий тармоқлардаги саҳифаларида минглаб фикрлар қолдирилмоқда. Қуйида фанатларнинг энг кўп қўллаб-қувватланган изоҳларидан айримлари:
Kipkoech Kigen:
«Винисиуснинг ҳужумларини тўхтатиш учун ўнг қанотга Ҳусановни қўйинглар, илтимос».
Mthõ Żiņtø:
«Винисиус Ҳусановдан ўтиб кета олмайди».
Favour Idike:
«Ҳусанов Матеуш Нуньешдан анча тезкор».
Sylviah Miruka:
«Реалга қарши ўйинни айнан Ҳусанов билан бошлаш керак».
Andy Bi:
«Винисиусни ушлаб туриш учун бизга Ҳусановнинг темпи ва тезлиги зарур. Нуньеш яхши, лекин унда бу даражада тезлик йўқ».
Murunga Tobius:
«Пеп унга кўпроқ ўйин амалиёти бериши шарт».
Mike MW:
«Ҳусанов Мбаппени ҳам назорат қила олади».
Бу фикрлардан кўриниб турибдики, Абдуқодир Ҳусанов нафақат ўзбекистонлик мухлислар орасида, балки жаҳондаги миллионлаб «Сити» ишқибозлари қалбида ҳам ўзига хос ўрин эгаллаган.
Катта синов олдидан катта ишонч
«Реал» — «Манчестер Сити» ўйини барчага катта таассурот бағишлаши турган гап. Айниқса, Винисиус Жуниор ва Килиан Мбаппе каби суперҳужумчиларга қарши ҳимояда ким майдонга тушиши жуда муҳим.
Фанатлар эса бир овоздан шундай дейишмоқда:
«Бизнинг танлов — Ҳусанов. Уни майдонда кўрмоқчимиз!»
Эндиликда қарор Гвардиола қўлида. Аммо бир нарса аниқ: миллионлаб мухлислар бу кечани Ҳусановнинг яна бир тарихий ўйинига айланишига умид қилиб туришибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
