Жаҳон футболида рақобат даражаси энг юқори бўлган чемпионат — Англия Премьер-лигаси нафақат совринлар учун кураш майдони, балки футболчилар учун катта саҳнага чиқиш имконияти ҳамдир. Бу лигада ўзини кўрсатган ҳар қандай ўйинчи қисқа вақт ичида Европа грандлари диққат марказига тушиши ҳеч кимни ҳайратга солмайди.
Футбол таҳлилчилари айни пайтда Премьер-лигада барқарор ўйин кўрсатаётган ва “катта олтилик” деб аталувчи “Манчестер Юнайтед”, “Манчестер Сити”, “Ливерпуль”, “Арсенал”, “Челси” ҳамда “Тоттенхэм” каби клублар таркибига деярли тайёр бўлган тўрт нафар ҳимоячини алоҳида ажратиб кўрсатишмоқда. Уларни бирлаштириб турадиган жиҳат — ишончли ўйин, жисмоний барқарорлик ва тактик саводхонлик.
“Кристал Пэлас” сафида тўп сураётган 25 ёшли Марк Гехи жамоанинг асосий устунларидан бирига айланган. Бош мураббий Оливер Гласнер қўл остида у ҳимоя марказида етакчи сифатида шаклланди. Гехи яккакурашларда ишончли, рақиб ҳаракатини олдиндан ҳис қила олади ва позиция танлашда деярли хато қилмайди. Шунингдек, унинг аниқ ва вазиятни тез очадиган паслари ҳимоядан ҳужумни босқичма-босқич қуришда катта аҳамият касб этади.
“Брайтон”нинг 25 ёшли ҳимоячиси Ян Паул Ван Хекке эса жанговорлик ва қатъият билан ажралиб туради. У ҳаводаги дуэлларда устун, жисмоний курашдан қочмайди ва майдонни кенг кўра олиши билан мутахассисларнинг эътиборини тортган. Бу сифатлар уни ҳимоядан ҳужумга тез ўтадиган замонавий футбол талабларига жавоб берадиган ўйинчига айлантирмоқда.
“Ньюкасл” сафида ўйнаётган Тино Ливраменто 23 ёшига қарамай, аллақачон юқори даражада тажриба тўплашга улгурган. Ўнг қанот ҳимоячиси сифатида унинг техникаси, тезлиги ва чидамлилиги юқори баҳоланмоқда. Энг муҳими, у майдоннинг икки қанотида ҳам самарали ҳаракат қила олади. Бу эса ҳужумкор қанот ҳимоячиларга катта аҳамият берадиган “Манчестер Сити” каби клублар учун жуда жозибали омил ҳисобланади.
Рўйхатдаги энг тажрибали футболчи — “Кристал Пэлас”нинг 29 ёшли ҳимоячиси Даниэль Муньос. У жонкуярлиги, юқори иш ҳажми ва халқаро майдонда орттирган тажрибаси билан ажралиб туради. Универсал ҳимоячи сифатида Муньос турли тактик схемаларга осон мослаша олади. Шу сабабли, айни пайтда қанот ҳимоячиларига алоҳида эътибор қаратаётган “Манчестер Юнайтед” учун у жуда қулай вариант сифатида кўрилмоқда.
Қисқаси, Англия Премьер-лигаси яна бир бор ўзининг энг яхши “витрина” эканини исботламоқда. Бу тўрт ҳимоячи эса яқин орада гранд клублар сафида намоён бўлиши мумкин бўлган номлар қаторида аллақачон муҳокама марказига чиқиб улгурди. Мухлислар учун эса трансфер бозори яна қизиқ интригаларга бой бўлиши аниқ.
Меҳмон гуруҳидаги фойдаланувчилар ушбу мақолага изоҳ қолдира олмайди.
