«Манчестер Юнайтед» бош мураббийи Рубен Аморим «Астон Вилла»га қарши баҳсдан кейин учрашув ҳақида батафсил фикр билдирди. Португалиялик мутахассис жамоаси мағлубиятга учраган бўлса-да, ўйин мазмуни ва майдондаги устунликдан қониқиш ҳосил қилганини яширмади.
Аморимнинг таъкидлашича, учрашув давомида «қизил иблислар» рақибидан кучлироқ ҳаракат қилган. Унинг сўзларига кўра, Бруну Фернандешнинг жароҳат сабаб майдонни тарк этиши жамоа учун жиддий йўқотиш бўлган, аммо шу ҳолатга қарамай, «Манчестер Юнайтед» ўйинни назорат қилишга ҳаракат қилган.
Мураббий рақибнинг узатмаларига қарши самарали кураш олиб борилганини, прессинг яхши ишлаганини алоҳида қайд этди. Шу билан бирга, у «Астон Вилла» футболчиларининг ҳам юқори даражада ҳаракат қилганини, айниқса ҳал қилувчи вазиятларда аниқлик кўрсатганини тан олди.
Аморимнинг фикрича, жамоа майдонда муносиб ўйин намойиш этган, аммо футболда энг муҳими — натижа. «Эртага ҳеч ким қандай ўйнаганингизни эмас, фақат ҳисобни эслайди», деган мураббий, мағлубият сабаб хулосалар чиқариш зарурлигини таъкидлади.
Мазкур учрашувдан кейин «Астон Вилла» 36 очко жамғариб, Англия Премер-лигаси турнир жадвалида учинчи ўринни эгаллаб турибди. «Манчестер Юнайтед» эса 26 очко билан еттинчи поғонада қолмоқда. Мавсум қизғин паллага кирган бир пайтда, ҳар бир очконинг аҳамияти янада ортиб бораётгани яққол сезилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
