Ўзбекистон миллий терма жамоаси ҳимоячиси Абдуқодир Ҳусанов "Maнчестер Cити" сафида ўйнаётгани сайин, унинг номи фақат маҳаллий мухлислар эмас, балки бутун дунёдаги футбол ишқибозлари ва мутахассислари орасида ҳам кўпроқ тилга олинаётгани сезиляпти. Англия Премьер-лигаси, мамлакат кубоклари ва UEFA Чемпионлар лигаси каби катта майдонларда у ўз услуби билан “мен шу ерга тасодифан келмадим” деган сигнални қайта-қайта беряпти.
Энг қизиғи, Ҳусанов Гвардиола жамоасида бир позицияга “қотиб” қолмай, ҳимоянинг ўнг қанотида ҳам, марказида ҳам ишончли ўйнай оладиган футболчи сифатида танилиб улгурди. Жисмонан бақувват, курашувчан, тезкор ва дуэлларда ҳеч кимдан чўчимайдиган характер — Хосеп Гвардиола тизимида айниқса қадрланадиган сифатлар. Шу боис экспертлар бугун Ҳусановни Европадаги энг яхши ёш ҳимоячилар қаторида тилга ола бошлади.
Биз эса унинг сўнгги учрашувларидан кейин турли мамлакатлардаги мухлислар ёзган фикр-мулоҳазаларни жамладик. Уларни ўқиб чиқсангиз, бир нарса аниқ: кўпчилик Ҳусановни нафақат “яхши ҳимоячи”, балки “Сити мудофаасини қайта тиклайдиган фигура” деб ҳам кўряпти.
Leo Ferns:
Ҳусанов жуда яхши ҳимоячи. Мен кўраётган ягона камчилик, тўп билан ишлашни яхшилаши керак. Бу кўпроқ ўйнаш ва тажриба орқали келади. Шунга эришса, у олдинга ҳужум қилиб, узун узатмалар ҳам бера олади.
Da Slow:
Ақлбовар қилмайдиган даражада ўйнаётган Ҳусанов ҳали 21 ёшда! Пеп айтганидек, жамоада энг яхши марказий ҳимоячи бўлади.
Abdoul Fataw Dai:
Ҳусанов қандай қилиб шунчалик баланд сакрайди?
Victor Hamulonga:
Ҳусанов ҳозирги кунда “Сити”даги ягона ишончли ҳимоячи.
Magdi:
Ҳусанов “Манчестер Сити” мураккаб вазиятда қолган вазиятда майдонга тушишга лойиқ эканини исботлади. Энг қизиғи, мен 1996 йилдан бери “Манчестер Юнайтед” мухлисиман, лекин Ҳусанов сабаб “Сити” ўйинларини кўришга, ҳатто уларни “Юнайтед”дан кўра яхшироқ билишга мажбур бўлдим.
Isaac Newkippeton:
Ҳимоя чизиғи Йошко Гвардиол – Марк Гехи – Рубен Диаш – Абдуқодир Ҳусановдан ташкил топиши керак.
Sulaiman Dan Vice:
Ҳусанов клубнинг мудофаа вазири.
Sofo Sophonia:
Абдуқодир Ҳусанов “Манчестер Сити”даги ўйинлари билан барчани ҳайратда қолдирмоқда! 21 ёшли футболчи Англияга келганидан бери анча ўзгарди.
Унинг жисмоний кучлилиги, тезлиги ва тўп билан ўзини эркин тутиши Пеп тизими учун катта актив. Ўнг қанот ҳимоячиси ва марказий ҳимоячи бўлиб ўйнаш осон эмас, аммо Ҳусановнинг универсаллиги ўйинни ўзгартираяпти. Агар у шу формани сақлаб қолса, Европанинг энг юқори даражасида кузатишга арзийдиган футболчи бўлади.
Akill Ashik:
Ҳусанов тўп билан ишлашини янада яхшилаб олса, мутлақо зўр ўйинчига айланади.
Shingirai Chizengeni:
Абдуқодирни Рубен Диаш билан марказда бирга ўйнатиб кўринглар. У ҳеч кимдан чўчимайдиган ва ҳеч нарсадан чекинмайдиган йигит.
Philip Ryan:
Абдуқодир биздаги энг яхши ҳимоячи. Умид қиламан, Пеп Диашни ўйнатиш учун уни захирага ўтқазмайди.
Leonard Fonga:
Менга унинг ўйин услуби ёқади. Ҳимоячилар агрессив бўлишини яхши кўраман, ҳудди Ҳусанов каби.
Handy Sphe:
Менинг энг яхши кўрган ҳимоячим — Ҳусанов.
Rasheed Kusale:
Абдуқодир узун узатмаларда ҳам жуда яхши. “Вулверхэмптон”га қарши баҳсда Мармушга берган ўша паси ажойиб эди.
Warren Paterson:
Ўтган мавсумдаёқ айтгандим, бу бола жаҳон даражасида бўлади. Унда ҳаммаси бор. Фақат тажриба керак, ҳозир эса у шуни олаяпти.
Irwan Ardiansyah:
Абдуқодир афсонага айланади. Ишонч билан айтаман, у Килиан Мбаппе тезлигига ҳам етиша олади.
Frank D. Chimeza Mashikizo:
Ҳусанов “Сити”даги биринчи ўйиниданоқ менинг фаворитимга айланган.
David Collinge:
Ҳусанов анча ёш ва ҳали ўрганяпти, лекин унинг жисмоний кучига тенг келадиган йўқ.
Preye Atikpa:
Ҳусановни зўр таянч ярим ҳимоячига айлантириш мумкин. Унинг ўйинни ўқиши жуда кучли. Уни Родри билан жуфт қилиб, Нико Гонсалесни олдинга суриш керак. Унинг тикланиши жуда яхши кетяпти.
Chikondi Nasiyaya:
Чемпионлар лигасида Ҳусановни ўйнатиш керак, у ерда янада самарали бўлиши мумкин.
Agoot Ayor Mabil:
Пеп шу тўртликни қўллаши керак: Ҳусанов, Рубен Диаш, Марк Гехи ва Райан Айт-Нури.
Jæçk Chiẞhímbæ:
Абдуқодир учрашувларни Диаш ва Гехи билан бирга бошлаши керак. Гехи ўнг ҳимоячи сифатида, Диаш ва Ҳусанов эса марказда ўйнасин.
Мухлислар фикрларида бир чизиқ жуда равшан: Ҳусановнинг кучли томонлари — тезлик, жисмоний тайёргарлик, қаттиқ характер ва позиция танлаш. Танқид сифатида эса кўпчилик бир нарсани қайта-қайта айтади: тўп билан ишлашни янада сайқаллаштирса, у “яхши ҳимоячи”дан “элита ҳимоячи”га айланади. Бу эса энг ёмон танқид эмас — аксинча, ўсиш нуқтаси аниқ дегани.
Энди энг муҳим савол: Ҳусанов шу темпни сақлаб қоладими? Агар у форма, соғлиқ ва ишончни ушлаб турса, Гвардиола тизимидаги универсал ҳимоячи сифатида унинг роли янада катталашиши мумкин. Мухлислар “мудофаа вазири” деб атаяптими — демак, жамоа ишона бошлаган. Энди эса навбат майдонда: ҳар ўйинда ўз сўзини яна бир марта исботлаш.
