«Арсенал»нинг собиқ футболчиси Иан Райт «Манчестер Юнайтед»да Рубен Аморим кетганидан кейин Кобби Майнунинг ўйини кўз ўнгимизда очилиб кетгани ҳақида кескин фикр билдирди. Райтнинг айтишича, жамоа академияси тарбияланувчиси бўлган ёш хавбекка ўша даврда етарлича ишонч берилмаган ва бу унинг келажагини ҳам хатар остига қўйган.
Фахрий футболчи португалиялик мураббийни очиқча танқид қилди. Унинг таъкидлашича, Аморим Майнуга оддий бир нарса — доимий ўйин амалиётини ҳам бермаган. Натижада, иқтидорли хавбек захирада қолиб кетаверган, ҳатто клубдан кетишга ҳам жуда яқин бўлган.
Райт эса «Тоттенҳэм»га қарши учрашувни мисол қилиб келтирди. «МЮ» 2:0 ҳисобида ғалаба қозонган ўша баҳсда Майнунинг ҳаракатлари жуда ишончли, катталарча ва эркин кўринди. Райтнинг баҳоси ҳам қаттиқ: у бу ўйинни «шунчаки ажойиб» деб атади ва Аморим бу қарорларидан уялиши кераклигини айтди.
«Очиғини айтадиган бўлсак, Аморим бундан уялиши керак, чунки биз «МЮ» академияси тарбияланувчисининг ўйинини кўрдик, португалиялик мураббий эса Майнуга шунчаки ўйнаш имконини бермаётганди ва у кетишга жуда яқин эди. Кобби ажойиб ўйин кўрсатди [«Тоттенҳэм»га қарши, 2:0]. Шунчаки ажойиб», — деди Райт.
Шу ерда яна бир муҳим нуқта бор: Майкл Кэррик бош мураббийликка келганидан кейин Майнуга муносабат ўзгаргани сезилди. Агар Аморим даврида Кобби кўп ҳолатларда фақат захирадан тушган бўлса, Кэррик илк ўйинларданоқ унга эътибор қаратди, ишонч билдирди ва майдонда ўзини кўрсатиши учун имконият очди.
Хулоса оддий: баъзан бир футболчининг “портлаши” учун супер трансфер ёки мўъжиза шарт эмас — фақат ишонч ва тўғри вақт керак. Майну шу ишончни олди, энди эса «МЮ» мухлислари унинг ўсиши давом этишини кутяпти.
