Лондоннинг "Арсенал" клубида мавсумнинг ҳал қилувчи паллалари яқинлашар экан, бош мураббий Микел Артета атрофидаги босим яна кучайди. Fichajes хабарига кўра, клуб раҳбарияти мураббийга унинг келажаги айнан шу мавсумдаги натижаларга боғлиқ эканини очиқ-ойдин етказган.
Гап қисқа: агар «тўпчилар» яна чемпионликка ета олмаса, Артетанинг лавозимини сақлаб қолиш имконияти жуда ҳам паст деб баҳоланмоқда. Яъни бу йил “яхши ўйнадик, аммо...” деган классик баҳоналар ўтмай қолиши мумкин.
Эслатиб ўтамиз, Артета 2019 йилдан буён жамоани бошқариб келяпти. Унинг қўл остида «Арсенал» кетма-кет уч мавсум Англия вице-чемпиони бўлди — натижа ёмон эмас, лекин Лондонда бир нарса ҳар доим қаттиқ талаб қилинади: кубок, айниқса чемпионлик. Ва асосий мақсадга ҳали ҳам етиб борилмагани айнан ҳозир унинг устидан “минус” бўлиб қайтяпти.
Охирги турда «Арсенал» сафарда Брентфорд билан 1:1 ўйнаб, ғалабани илиб кетолмади. Ҳа, етакчилик сақланиб қолди, лекин вазият анча сиғиқ: "Манчестер Сити" билан орадаги фарқ 4 очкогача қисқарди. Бундай темпда ҳар бир дуранг — рақибларга “марҳамат, яқинлашинг” дегандек таъсир қилади.
Энди жамоа учун асосий вазифа оддий: “чиройли футбол”ни эмас, натижани биринчи ўринга қўйиш. Чунки чемпионлик пойгасида ҳис-туйғу ҳам, статистика ҳам ўзига яраша, аммо охирида таблода қайси рақам тургани ҳал қилади. Артета учун эса бу мавсум — шунчаки навбатдаги йил эмас, катта имтиҳон. Мухлислар умиди бор: агар жамоа охиригача кучли босимда ҳам синовдан ўтса, бу нафақат кубок, балки бутун лойиҳанинг “энди ҳақиқатан тайёр” деган тамғаси бўлади.
“Zamin”ни Telegram'да ўқинг!
