Муборакнинг “Машъал” жамоаси 2026 йилги мавсум олдидан таркибни мустаҳкамлаш ишларини изчил давом эттирмоқда. Клуб расмий маълумотига кўра, жамоа ганалик марказий ярим ҳимоячи Абдул Рашид Абубакар билан шартнома имзолади.
2000 йил 16 март куни туғилган (25 ёш) футболчи майдон марказида ишончли ҳаракатлари, юқори жисмоний тайёргарлиги ва кўп қирралилиги билан ажралиб туради. Абубакар фақат марказий ярим ҳимоячи сифатида эмас, балки таянч ва ҳужумкор ярим ҳимоячи ролларида ҳам самарали ўйнай олиши билан қимматли кадр ҳисобланади. Бўйи 178 см бўлган легионер ўнг оёқли футболчи саналади.
Абдул Рашид Абубакар профессионал фаолиятини "Accra Lions" клубида бошлаган. Кейинчалик у халқаро майдонларда тўп суриб, турли чемпионатларда тажриба тўплашга улгурди. Хусусан, Босния ва Герсеговинада ФК “Саражево”, Сербияда “Лозница”, Оманда “Баҳла”, Молдовада “Спартании Селемет” жамоалари шарафини ҳимоя қилган. Шунингдек, Қозоғистон Премьер-лигасида “Ордабасы” ҳамда “Атырау” таркибларида ҳам иштирок этгани қайд этилди.
Футболчи “Машъал” сафига эркин агент мақомида қўшилди. “Трансфермаркт” портали маълумотларига кўра, унинг трансфер қиймати 100 минг евро атрофида баҳоланмоқда.
Клуб матбуот хизмати таъкидлаганидек, янги легионернинг майдон марказидаги фаоллиги, ўйинни ўқиш қобилияти ҳамда халқаро тажрибаси “Машъал”нинг янги мавсумдаги мақсадларига етишда муҳим омил бўлиши кутилмоқда.
Қисқаси, “Машъал” марказ чизиғига характерли, кўп вазифали футболчини олиб келди. Энди эса асосий савол битта: Абубакар шу тажрибасини Муборакда натижага айлантира оладими — мавсум бошланса, ҳаммаси майдонда кўринади.
“Zamin”ни Telegram'да ўқинг!
