АПЛда чемпионлик пойгаси қизиб турган бир пайтда «Вулверҳемптон»га қарши баҳс «Арсенал» учун ҳақиқий асаб синовига айланди. Икки тўп фарқи билан олдинга чиқиб олган «тўпчилар» ўйинни 2:2 ҳисобида тугатиб, энг керакли жойда қиммат очколардан айрилди. Ва шу билан лигадаги интрига янада “портлади”.
Англиялик собиқ футболчи Алан Смит ўйиндан кейин айнан шу дурангни мавсумнинг бурилиш нуқтаси деб баҳолади. Унинг фикрича, энди вазият «Манчестер Сити» фойдасига кескин бурилиши мумкин: чунки очко йўқотиш — бу ҳамма нарса “қўлда” турган пайтдаги энг оғриқли хатодир.
Смитнинг таъкидлашича, аутсайдерга қарши ўйинда икки тўп устунликка эга бўлиб туриб, ғалабани қўлдан чиқариш — “кечириб бўлмайдиган” ҳолат. Чемпион бўлишни истаган жамоа айнан шундай баҳсларда совуққонликни сақлаб қолиши, ўйинни “ёпишни” ва натижа учун курашишни билиши шарт.
Яна бир жиҳат: «Арсенал» ҳақида кўп гапирилади — “энг кучли жамоа”, “мукаммал таркиб”, “замонавий футбол” деган баҳолар тез-тез учрайди. Аммо Смит бундай мақтовлар ўринсизлигини ҳам очиқ айтди: агар жамоада қатъият, босим пайтида тўғри қарор қабул қилиш ва ҳисобни ушлаб қолиш маданияти бўлмаса, гўзал ўйиннинг қиймати пасаяди.
Ҳозирги ҳолатга кўра, «Арсенал» 58 очко билан жадвалда пешқадам. «Манчестер Сити» эса 53 очко билан иккинчи ўринда, устига-устак битта захира ўйини ҳам бор. Агар «шаҳарликлар» ўша ўйинда уч очкони олишса, 5 очколик оралиқ 2 очкогача қисқариши мумкин. Демак, «Арсенал» учун ҳар бир кейинги тур — фақат ўйин эмас, титул учун “нерв уриши”.
Қисқаси, бу дуранг шунчаки дуранг эмас. Бу — чемпионлик йўлидаги сигнал. Энди «Арсенал»дан талаб битта: гапни кўпайтирмай, ўйинни ёпиб, очколарни “қўлда” ушлаб қолиш. Акс ҳолда, «Сити» бу совғани жон деб олади.
“Zamin”ни Telegram'да ўқинг!
