Испания Ла Лигасининг 25-турида «Алавес» ўз майдонида «Жирона»ни қабул қилди. Бу ҳақда euro-football.ru хабар беради.
Учрашув 5-дақиқадаёқ мезбонлар фойдасига ҳал бўлаёзди: Юссеф Энрикес тўпни олиб қўйиб, Лукас Бойени қулай вазиятга чиқарди ва у ҳисобни очди — 1:0. Биринчи бўлим ўрталарида Антонио Мартинес устунликни ошириш имконига эга бўлди, бироқ бош билан йўллаган зарбаси аниқ чиқмади.
Орадан кўп ўтмай «Жирона» стандарт вазиятдан жавоб қайтарди: бурчак тўпидан кейин Аксел Витсел бош билан пас узатди, Владислав Ванат эса дарвозани аниқ нишонга олди — 1:1.
Иккинчи бўлимда меҳмонлар тезкор ҳужум орқали олдинга чиқиб кетди. 73-дақиқада Аззеддин Унаҳи Виктор Циганков учун ажойиб имконият яратиб берди ва украиналик футболчи «Жирона»нинг иккинчи голини урди — 1:2. Кейинроқ Унаҳининг ўзи ҳам қарши ҳужумда гол уриши мумкин эди, аммо дарвозабон ўз маҳоратини кўрсатиб, зарбани қайтарди.
Баҳс якунида «Алавес» барибир мағлубиятдан қочди: 89-дақиқада Виктор Параданинг узатмасидан сўнг Лукас Бойе бош билан дубл қайд этиб, ҳисобни тенглаштирди — 2:2.
Дурангдан сўнг «Жирона» турнир жадвалида 11-ўринда қолди, «Алавес» эса ундан уч очко ортда бўлиб, 14-поғонани эгаллаб турибди.
“Zamin”ни Telegram'да ўқинг!
