УЕФА Чемпионлар Лигасининг 1/8 финал босқичига қуръа ташланди ва унинг энг катта марказий афишаси сифатида “Реал” ҳамда “Манчестер Сити” қарама-қаршилиги юзага келди. Ньонда ўтган қуръа натижасига кўра, айнан шу икки гранд чорак финал йўлланмаси учун кураш олиб боради. Reuters қайд этганидек, бу икки жамоа 2019/20 мавсумидан бери плей-оффда олтинчи бор тўқнашмоқда ва Чемпионлар Лигаси тарихида илк бор икки клуб кетма-кет беш мавсум нокаут босқичида бир-бирига қарши чиқади.
Уларнинг ўзаро рақобати аллақачон Европа футболида алоҳида бобга айланган. УЕФАнинг расмий head-to-head саҳифасига кўра, ҳозиргача бу жамоалар Чемпионлар Лигасида 15 марта куч синашган: “Реал” 5 марта ғалаба қозонган, “Сити”нинг ҳам 5 та ютуғи бор, яна 5 баҳс дуранг билан якунланган. Голлар нисбати ҳам деярли тенг — мадридликлар 25 бор, манчестерликлар 26 бор рақиб дарвозасини ишғол қилган.
Бу рақобатнинг илк саҳифалари 2012/13 мавсумда ёзилганди. Ўшанда гуруҳ босқичида “Реал” ўз майдонида 3:2 ҳисобида устун келган, Манчестердаги жавоб учрашуви эса 1:1 ҳисобида тугаган. Шундаёқ бу жуфтлик оддий эмаслиги, ҳар бир учрашувида интрига ва кескинлик бўлиши аниқ сезилганди.
2015/16 мавсумда икки жамоа яримфиналда тўқнашди ва бу сафар минимал устунлик “Реал” томонда бўлди. Манчестердаги илк баҳс 0:0 билан тугаган бўлса, Мадридда “қаймоқранглилар” 1:0 ҳисобида ғалаба қозониб, финалга йўл олган.
2019/20 мавсумда навбат “Сити”га келди. 1/8 финалда Пеп Гвардиола шогирдлари аввал Мадридда 2:1, кейин Манчестерда ҳам 2:1 ҳисобида зафар қучиб, “Реал”ни мусобақадан чиқариб юборган. Бу ғалаба инглиз клуби учун ўзаро рақобатда муҳим бурилишлардан бири бўлганди.
2021/22 мавсумда яримфинал яна ҳақиқий футбол драмасига айланди. Манчестердаги биринчи баҳсда “Сити” 4:3 ҳисобида устун келган бўлса, жавоб ўйинида “Реал” 3:1 ҳисобида ғалаба қозониб, афсонавий камбэк эвазига финал чиптасини илиб кетган. Бу тўқнашув ҳалигача Чемпионлар Лигасининг энг эсда қоларли кечаларидан бири сифатида тилга олинади.
2022/23 мавсумда эса манчестерликлар реванш олди. Мадриддаги 1:1 дан кейин “Сити” ўз майдонида “Реал”ни 4:0 ҳисобида йирик мағлубиятга учратиб, навбатдаги босқичга йўл олган. 2023/24 мавсумда эса вазият яна тескари бурилди: Мадриддаги 3:3 ва Манчестердаги 1:1 дан кейин “Реал” пенальтилар сериясида 4:3 ҳисобида устун келди.
2024/25 мавсумдаги плей-офф ўтиш босқичида ҳам “Реал” устун чиқди — аввал Манчестерда 3:2, кейин Мадридда 3:1. Жорий 2025/26 мавсумдаги лига босқичидаги охирги учрашувда эса “Манчестер Сити” декабрь ойида “Реал”ни 2:1 ҳисобида мағлуб этган. Яъни янги баҳс олдидан ҳар икки томонда ҳам ўзига яраша руҳий асос бор.
Қисқаси, бу сафарги 1/8 финал шунчаки навбатдаги плей-офф эмас. Бу — сўнгги йилларда Чемпионлар Лигасининг энг катта классик қарама-қаршиликларидан бирига айланган дуэлнинг янги боби. “Реал” ўз тарихи ва характерига таянади, “Сити” эса замонавий куч ва тизимли футболини яна бир бор намойиш қилмоқчи. Мухлислар учун эса битта нарса аниқ: бу жуфтлик яна Европа футболининг энг қизиқ кечаларини тақдим этади.
“Zamin”ни Telegram'да ўқинг!
