“Челси” мухлислари орасида жамоанинг барқарор бўлмаган ўйини ва натижалардаги тушкунлик сабабли келаси ёзда бир қатор асосий футболчилар клубни тарк этиши мумкинлиги ҳақида хавотир кучаймоқда. Шу билан бирга, Англиянинг етакчи клублари ҳам “аристократлар” таркибидаги етакчиларга аллақачон кўз тиккан.
Маълумотларга кўра, агар “Челси” Европа Чемпионлар лигасига йўлланмани қўлга кирита олмаса, жамоани бир неча муҳим ўйинчилар тарк этиши эҳтимоли юқори. Улар орасида Энцо Фернандес, Мойзес Кайседо ва Марк Кукурелья каби футболчилар бор, бу рўйхат янада кенгайиши мумкин.
Журналист Саймон Филлипс маълум қилишича, ҳатто Коул Палмер ҳам клубдаги вазиятни диққат билан кузатмоқда ва кетиш имкониятини инобатга оляпти. Бироқ у “Челси” унинг трансфер қийматини сунъий равишда ошириб юбориши мумкинлигидан хавотирда.
Филлипснинг қўшимча қилишича, “Арсенал” Англия терма жамоаси аъзоси Палмерга жиддий қизиқиш билдирган. Лондонликлар уни Кай Хаверц ўрнини тўлдириши мумкин бўлган асосий вариант сифатида кўрмоқда.
Маълумотларга кўра, “Арсенал” ёзги трансфер ойнасида таркибда катта ўзгаришлар қилишни режалаштирмоқда. Мартин Эдегор, Кай Хаверц, Итан Нванери ва Микель Мерино келажаги ноаниқ бўлиб турган бир пайтда, клубга “10-рақам” позициясида ўйнай оладиган суперюлдуз зарур.
Айнан шу нуқтада Коул Палмер “Арсенал”нинг асосий трансфер нишонига айланган. Жамоа уни яримҳужум чизиғида етакчи фигура сифатида кўрмоқда ва унинг келиши билан ўйин услубини кучайтиришни мақсад қилган.
“Zamin”ни Telegram'да ўқинг!
