«Реал Мадрид» президенти Флорентино Перез жорий мавсумдаги муваффақиятсиз натижалардан сўнг Алваро Арбелоани истеъфога чиқаришга қарор қилди. Гарчи бош мураббий кийиниш хонаси ва клуб раҳбариятининг айрим аъзолари томонидан қўллаб-қувватланаётган бўлса-да, президент жамоада ўзгаришлар қилиш вақти келган деб ҳисобламоқда. Бу ҳақда Goal.com хабар беради.
Мадридликлар жорий мавсумда совринсиз қолишди ва Испания чемпионатида «Барселона»дан 9 очко ортда қолмоқда. 2026 йил январь ойида Хаби Алонсо ўрнини эгаллаган Арбелоа футболчилар билан яхши муносабат ўрнатган бўлса-да, барқарор натижаларни таъминлай олмади. Перезнинг фикрича, клубнинг юксак стандартлари учун ҳозирги ғалабалар кўрсаткичи етарли эмас.
Клуб маъмурияти ичида ушбу масала бўйича келишмовчиликлар юзага келган. Айрим раҳбарлар 43 ёшли мутахассисга жамоани қайта қуриш учун имконият бериш кераклигини таъкидламоқда. Бироқ журналист Хорхе Пиконнинг ёзишича, айнан Флорентино Перез мураббий алмашиши шарт деган қатъий позицияда қолмоқда.
Арбелоа бошқарувидаги 22 ўйинда «Реал Мадрид» 14 ғалаба ва 7 мағлубият қайд этди. Жамоа Испания Суперкубоги финалида «Барселона»га ютқазди, мамлакат кубогидан чиқиб кетди ва Чемпионлар лигаси чорак финалида «Бавария»га имкониятни бой берди. Шу сабабли клуб Хосе Моуринё, Юрген Клопп, Дешам, Почеттино ва Скалони каби номзодларни кўриб чиқмоқда.
Мураббийнинг келажаги бўйича якуний қарор июн ойида, номзодларнинг бандлиги ва раҳбариятнинг умумий фикри ўрганилгандан сўнг қабул қилинади. Ҳозирча жамоа Ла Лигадаги қолган ўйинларни ўтказиб, ёзги трансфер ойнаси ва кутилаётган катта ўзгаришларга тайёргарлик кўради.
“Zamin”ни Telegram'да ўқинг!
