Ўзбекистон Суперлигасида 10-тур старт олмоқда ва бу галги тур мухлислар учун ҳақиқий футбол байрамига айланиши кутилмоқда. Бир қатор дербилар, принципиал тўқнашувлар ва кутилмаган натижалар эҳтимоли — ҳаммаси бор. Демак, бу турни ўтказиб юбориш — ўзингга қарши ишлаш билан тенг.
27 апрель куни дастлабки ўйинларда «ОКМК» ва «Локомотив» ўзаро куч синашади. Миржалол Қосимов шогирдлари мавсумни қийин бошлаган бўлса-да, сўнгги турларда ўзини тиклаб олди — 4 ўйиндан бери мағлубият йўқ. «Локо» эса рақибидан икки очко устун. Тошкент дербиси ҳар доим кутилмаган сценарийга бой бўлади.
Шу куни «Машъал» — «Бухоро» баҳси ҳам диққат марказида. 9 турдан бери ютқазаётган муборакликлар ниҳоят мураббийни алмаштирди. Энди жамоани Элдор Сакаев бошқаради. Янги нафас бера оладими ёки серия давом этадими — асосий савол шу.
28 апрель куни «Андижон» ўз майдонида «Динамо»ни қабул қилади. «Бургутлар»да ўйин аста-секин жойига тушмоқда, натижалар ҳам яхшиланмоқда. «Динамо» эса ҳали барқарорликни топа олгани йўқ. «Бобур арена»даги атмосфера эса алоҳида шоу бўлиши аниқ.
«Сўғдиёна» — «Сурхон» қарама-қаршилигида эса эҳтиёткор футбол кутиш мумкин. Жиззахликлар ҳимояда муаммоларга эга, аммо ҳар бир очко улар учун олтинга тенг.
Турнинг марказий ўйини — «Пахтакор» ва «Насаф» тўқнашуви. «Аждарлар»да етакчилар кетиши таъсир қилмоқда, «шерлар» эса ўз услубида барқарор. Собиқ «насаф»чиларнинг янги жамоаси таркибида “Аждарлар”га қарши ўйини алоҳида интрига қўшади.
29 апрель куни Фарғона дербиси — «Нефтчи» ва «Қўқон-1912» ўртасидаги баҳс ҳам катта қизиқиш уйғотади. Бу ўйинда фаворит — майдон эгалари, лекин дербида логика ҳар доим ҳам ишламайди.
«Қизилқум» — «Хоразм» учрашуви эса мутлақо тенг рақиблар ўйини. Ҳар икки жамоа 12 очкодан жамғарган — демак, ҳар қандай натижа реал.
Турни «Бунёдкор» — «Навбаҳор» баҳси якунлайди. Молиявий муаммоларга қарамай, «қалдирғочлар» курашмоқда. Аммо «Навбаҳор» — жиддий рақиб. Бу ўйинда ҳужумлар ва эмоциялар етарли бўлиши аниқ.
Қисқача айтганда, бу тур — драйв, дерби ва драмалар микси. Футбол бор жойда сюрприз бор. Демак, экрандан узоқлашманг.
“Zamin”ни Telegram'да ўқинг!
