"Манчестер Юнайтед" клуби "Милан" ҳужумчиси Рафаэл Леаони сотиб олиш бўйича ҳаракатларини фаоллаштирди. Инглиз клуби скаутлари Италия чемпионатининг навбатдаги турида португалиялик футболчининг ўйинини бевосита стадиондан кузатиб боришди. Бу ҳақда Goal.com хабар беради.
"Милан" ва "Ювентус" ўртасидаги учрашувда 81 дақиқа ҳаракат қилган 26 ёшли ҳужумчи майдонни мухлислар ҳуштакбозлиги остида тарк этди. Италия матбуотининг ёзишича, миланликлар раҳбарияти молиявий ҳолатни яхшилаш учун юлдуз футболчини сотишга тайёр.
Ҳозирда Леаонинг трансфер қиймати 52 миллион фунт стерлингга баҳоланмоқда. Бу сумма Европанинг кўплаб гранд клублари учун қулай имконият сифатида кўрилмоқда, чунки футболчи ҳам қанотда, ҳам марказий ҳужумда самарали ўйин кўрсата олади.
Трансфер эксперти Фабрисио Романо бир неча Премьер-лига клублари футболчининг ҳолати бўйича сўров юборганини тасдиқлади. Ҳозирча расмий музокаралар бошланмаган бўлса-да, ёзги трансфер ойнаси учун тайёргарлик ишлари олиб борилмоқда.
"Манчестер Юнайтед"дан ташқари, Леаога "Барселона", "Ливерпуль" ва Саудия Арабистони клублари ҳам қизиқиш билдирмоқда. Майкл Кэррик бошқарувидаги жамоа Чемпионлар лигаси йўлланмасини қўлга киритса, ушбу трансферни амалга ошириш имконияти янада ортади.
“Zamin”ни Telegram'да ўқинг!
