Испания ва Миср ўртасидаги ўйинда мухлислар диний камситишга йўл қўйишди

Испания ва Миср терма жамоалари ўртасидаги ўртоқлик учрашуви (0:0) вақтида мухлисларнинг ножўя хатти-ҳаракатлари футбол оламида кескин норозиликларга сабаб бўлди. Стадионга ташриф буюрган испан ишқибозлари рақиб жамоага қарата диний мазмундаги ҳақоратли сўзларни айтиб бақиришган. Бу ҳақда Goal.com хабар беради.

Ижтимоий тармоқларда тарқалган видеоларда мухлисларнинг «сакрамаган одам мусулмондир» қабилидаги ҳайқириқлари аниқ эшитилган. Ушбу ҳолатга Испания терма жамоаси ва "Барселона" клуби юлдузи Ламин Ямал ўзининг Instagram саҳифасида муносабат билдирди.

Футболчи ўзи ҳам мусулмон эканлигини таъкидлаб, бундай ҳаракатларни ҳурматсизлик ва қабул қилиб бўлмас ҳолат деб атади.

«Кеча стадионда янграган ҳайқириқлар шахсан менга қаратилмаганини билсам-да, мусулмон сифатида буни ҳақорат деб қабул қиламан. Футбол одамларни эътиқоди учун камситиш эмас, балки завқланиш ва бирлашиш учун хизмат қилиши керак», — деди Ламин Ямал ўз баёнотида.

Унинг жамоадоши Педри ҳам ушбу вазиятдан ҳайратда эканини ва футболчилар ҳар қандай кўринишдаги ирқчиликка қарши эканини маълум қилди. Терма жамоа бош мураббийи Луис де ла Фуэнте эса бундай шахсларни жамиятдан ажратиш ва стадионлардан бутунлай четлатиш зарурлигини таъкидлади.