Оммавий ахборот воситаларининг хабар беришича, Коул Палмер "Манчестер Юнайтед" сафига ўтиши мумкин.
Коул Палмернинг "Манчестер Юнайтед"га ўтиши ҳақидаги миш-мишлар кўпаймоқда. Собиқ футболчи Жо Коулнинг таъкидлашича, ёш юлдузнинг "Челси"дан кетиши жамоанинг Чемпионлар лигасига йўлланма олишига бевосита боғлиқ.
"Челси" жорий мавсумда Чемпионлар лигаси йўлланмасини қўлга кирита олмаса, бу клуб учун жиддий оқибатларга олиб келиши мумкин. Хусусан, Энцо Фернандес ҳам келажакда Мадридга кўчиб ўтиш истагини яширмаяпти.
23 ёшли Палмер эса ўзининг она шаҳри Манчестерга қайтишни режалаштираётгани айтилмоқда.
Палмер "Ман Сити" академиясида тарбияланган бўлса-да, болалигидан "Манчестер Юнайтед" мухлиси бўлган. "Челси" ўзининг асосий юлдузига айланган футболчини осонликча қўйиб юбормаслиги аниқ ва унинг трансфери учун катта маблағ талаб қилади.
Жо Коул бу борада шундай деди: "Биз унинг "Челси"да қолишини хоҳлаймиз. Аммо клуб футболчиларга керакли даражани тақдим эта олмаса, уларнинг фикри ўзгариши табиий.
Палмер юқори даражада ўйнашни истайди, шунинг учун ҳаммаси Чемпионлар лигасига боғлиқ".
Англия терма жамоасининг 2026-йилги Жаҳон чемпионати қайдномасидан жой олиши кутилаётган Палмер "Челси" билан 2033-йилгача шартнома имзолаган. У Лондон клуби сафида 126 та ўйинда 53 та гол уришга эришди.
“Zamin”ни Telegram'да ўқинг!
